Хӏинца йолайели-кх хьуна ткъорш...

Хӏинца йолайели-кх хьу́на ткъорш,
Хӏинца ву-кх хьо цӏийна^н соний^н тутмакх.
Пеша хьалха цӏарах хеба дорс (Даьккхина дечиг),
Тар а тесна хьийза не́на^н урчакх

Хӏинца йуззий латаййелахь пеш,
Хьайн дог дуззий латаййелахь ойла
Кора хьалха мокха йоьлху беш,
Ца лиъне́ра-кх иза гӏийла гойла.

Ца лиъне́ра-кх гӏийла гойла и,
Урамашкахь хьа^н са де́ха кӏо́тар,
Амма хе́но шийла йассай^н
Хьа^н иллешца йекна хьанний хотеш.

Ца лиъне́ра-кх гӏийла гойла и,
Ше́н куьйгаш тӏехь хьо техкийна на́на,
Амма хено некъ хьа^н идаби,
Ворда санна, соцур бо́хуш кха́на.

Ца лиъне́ра-кх! Хӏу^н де́р тӏаккха? Хӏу^н?
Нисдалар а наггахь маьӏне хилча.
Ахь хьай^н даг чу гулде́ хе́на^н хӏу,
Сингаттаман о́рам бохбе цӏийца.

Схьахетарехь, де́ха хир ду ӏа,
Схьахетарехь, де́ха хир ду да́хар.
Дерриге а дагала́ца ахь,
Хьай^н синпхе́нах боккхуш мисар-ма́ха.

Дагалецам дарба ларий хьай^н,
Сица малло, дегалазам бойуш,
Хезар хьу́на маьлха^н басахь сай,
Дашо бӏаьргаш бешна хьайга кхойкхуш.

Карладаккхий, цкъа тӏаьххьара, цкъа
Дагала́ца хӏинца аьхна урд ахь,
Малхехь лепа кӏай^н кӏир тоьхна цӏа,
Хьа^н туьйранех хьол а тешна йурт а...

Карладаккхий, латайелахь цӏе,
Дагалецам синан пеша тиллий.
Цхьалли^н чиллехь адам дохкден цӏе
Цхьаъ йу хьу́на — бӏаьрхил довха илли.

Йелхарх хӏу^н ду кора хьалха беш?
Хьа^н сингаттам малхал цӏена гойла-кх!
Хӏинца йуззий латайелахь пеш,
Хьай^н дог дуззий латайелахь ойла.