Борз а, къена ка а

Цхьо́гал
— Эхӏ-хӏай, ма дика гӏуллакх ду и, — бо́ху цхьо́гало, — амма, хьу́на-хьайна хаьа хир ду-кх, теш ца хилча цхьа́ а къийсам чекх ца бо́лий, цунде́ла со теш дигахь, со хьоьгахьа хир ду, ткъа ахь су́на уьстагӏан чоко а, когаш-корта а лур бу.

Борз
— И да^н мегар долуш хӏума ду, схьадола соьца — аьлла, жоп делла барзо.

Борззий, цхьо́галий бай болчу кхаьчна, тӏаккха барзо кане хаьттина:

Борз
— Тӏаккха, дийцал, хӏинца а хьайн жаӏу^н бу бо́ху ахьа хӏара бай?!

Ка
— Де́ра бо́ху, — э́лира кано.

Цхьо́гал
— Э-э-э, ка, эхь ца хета хьу́на аьшпаш битта! — бехк боккхуш э́лира цхьо́гало, корта а техкош. — Дукха хе́нахь дуьйна массарна а хууш ма ду хӏара бай, кхи^н цхьанна^н а бо́цуш, берза^н буй.

Ка
— Хьу́на хьаьнгара хезна и? — хаь́ттина кано.

Цхьо́гал
— Хьаьнгара хезна бо́хург хӏу^н ду?! — цецъдаьлла, мохь хьаькхира цхьо́гало.
— Хьайна луучуьнга ха́тта мегар ду хьу́на, и массарна а хууш ду. Су́на дагадо́гӏу, дукха хан йу и хилла, со жима долчу хе́нахь, са^н да́с-на́нас кест-кеста къамел дора кху байх лаьцна. Кхе́чу меттигашкахьчул, берзан бай тӏехь долу дехкий дерстина даттӏа дохкуш хуьлу, о́лура ца́ра. Тӏаккха ца хаьа хьу́на, нагахь хӏара бай жаӏу^н белахьа́ра, ца́ра цунах берза^н бай э́р ма да́цара.

Ка
— Дика ду делахь! Дуй буий ахьа, айхьа дуьйцург бакъ ду, аьлла? — хаьттира кано.

Цхьо́гал
— Ой, де́ра буу, — э́лира цхьо́гало.

Ка
— Дика ду. Оцу коьллаш йуккъе цхьа ког а хӏотта бай, а́ла: аса дуй буу (Де́лаца), хӏара бай берзан бу, — аьлла кано.

Цхьо́гална, коьллаш тӏе йолалушшехь, цу йуккъера къега ши бӏаьрг гина, тӏаккха сихха йуха а йирзина, гено а йаьлла, йоьхна а хьоьвзина, аьлла цо:

Цхьо́гал
— Бакъ дерг аьлча, су́на схьахетарехь, са^н да́с-на́нас цу байх лаьцна дечу шай^н къаме́лехь уьстагӏах лаьцна а хьахийра… Билггал а́ла ца хаьа су́на, хӏара бай хье́на^н бу, цунде́ла къа тӏе ла́ца ца лаьа су́на, дуй а бууш. Нагахь барзо дуй баахь, аса а буур бу-кх.

Борз
— Хьу́на хӏу^н моьтту, — аьлла, оьгӏазйахана чутасайелира борз, — хьо санна кхоьруш йац со, аса буур бу дуй!