Стайн муьттах ӏенаш йу Нохчийчохь гуьйре...

Стайн муьттах ӏе́наш йу Нохчийчохь гуьйре,
Дӏанисдеш, дӏашардеш тӏаьххьара гунаш,
Ас хоьттуш: «Ва ӏуьйре, адаман ӏуьйре,
«Хӏу^н дахьаш йеъна хьо? Дийцахьа су́на».

Ткъа жоп а хеза-кха, ӏуьйре йистхилча:
«Де́къала хуьлда-кха веънаверг ва́ха,
Ловчунна хӏумма а дац хьу́на ирча,
Адамо кхоьллинарг ду хьу́на да́хар».

Цхьа синаайаме дуьненна, ханна
Герггара малхо а боьллу ше́н бӏаьргаш.
Мел велларг, мел вайнарг цӏа веъча санна,
Тишйелла на́на а хьоьжу са^н бӏаьра.

Дӏо́ орцан хьаннашкахь дохкк санна, дов-кха
Са^н дагалецамехь мел хилла зе́наш.
Миччара гӏовттахь а, миччара дахь а,
Ирсана хилле́ра са^н некъийн зераш.

Со цунах кхе́тарна воккхаве хӏинца,
Малх санна, йурт йолуш, гӏелвелча товжа.
Мел миска хиллехь а ас лехна рицкъа,
Дуьне а дохдеш йу са^н не́на^н товха.

Цкъа Азехь на́халахь коьртах а ваьлла,
Са^н де́дас лийринарг ба́цахь а кхерч са^н,
Кхузахь со иллица билгалаваьлла,
Кху лаьтто йохйо са^н вежарий^н берчаш.

Кху лаьттахь (доллучул коьрта и ла́ра)
Де́^н чурт ду — са^н некъийн зерата^н хӏолла́м.
Ас мацах чӏагӏдина, цӏе йо́цуш варах,
Цуьнга на кхо́чудерг илли ца кхолла.

Ца кхолла пачхьалкхан, дуьненан цӏарах
Дош а, шех кхардодерг кху лаьттан динберг
Чекхдо́лий за́мана^н чилланах, цӏарах,
Хӏоккхузахь охьало са^н хилларг, хиндерг.

Хууш ву со хӏокху ла́марой^н кӏа́жехь
Хӏиттиний кхелана дуьненан майда.
Мел чӏо́гӏа гӏертарх а Европехь, Азехь
Курачу шахьаршкахь дӏадаьлларг кӏайда.

Хууш ву со, эзар тукхамий^н цӏарца
Дуьненан шад хилла, лаьттина а́гӏо
Тахана йуха а де́къала барца
Са^н синна карайой бӏешерий^н чӏа́гӏо.

Хууш ву — и хаар хилла са^н ӏуьйре,
Кхуззахь малх болабеш мел ве́хачунна.
Стай^н муьттах ӏе́наш йу Нохчийчохь гуьйре,
Гечдина кху лаьттахь мел хиллачунна.