Ребӏат дечиге йахар

- Ба́ба, со варставо ахьа къонах верстина хилча товш дац, ма бо́хура ахьа, - ба́бас шеца хӏоттош долу гӏиллакх шена товш хилар къайла да́ккха гӏертара кӏант.

- Хьо хӏинца а дегӏ доккхуш ма ву. Ахьа хӏинца дика хӏума йууш ца хилахь, ахьа дегӏ а доккхур дац, ницкъа болуш а хир вац хьо, - хьехарш дора ба́бас. Хӏума йихна шаьшиъ даьлча ба́бас леррина схьагулла йора йуург. Цхьа цинц а ца йуьтуш сискал а йуха гатана йуккъе хьарчайора, цуьна^н кӀе́да, ховха хилар ца дайийта, цуьргаш йисте куьйг а ло́ций вукху куьйга тӏегулла а йой, дӏакхоллура ба́бас. Бехк бо́цуш нохчий^н къам цӏе́ра а́радаьккхинчохь Къилба седа Казахстанехь ша́ лайна мацалла дагайо́гӏура цунна хӏо́ра а ша́ иштта гулйина сискала^н цуьргаш дӏакхоллуш. Ше́н хӏусама^н да́ Хьуьсен, Сайдӏали^н не́на^н да́ ла́ралуш волу, кӏант Шамсудди а дагаво́гӏура Ребӏатна. Хьуьсен а, Шамсудди а цамгарой, мацалой Казахстанехь дӏакхаьллине́ра.  Цхьа нохчий^н хӏусама йац-кх хӏусамехь йа масех стаг, йа шайолу хӏусама хӏаллака хиланза! Йовлакха^н тӏома^н маьӏиг хьаькхина бӏаьргах охьахьаьдда хин тӏадам дӏа а боккхий, цхьа хӏума дага а деъна бехкала йахача санна йелакъежира Ребӏат:

- Сайдӏали, хӏинца хьо санна со жима йолуш, хезна су́на тхайн на́нас Датос о́луш: боьрша стаг хьуьнха дечиге вахача, зингат де́лало о́луш. Ткъа зуда хьуьнха йеъча зингат доьлху бо́ху.

- Ба́ба, зуда хьуьнха йахача стенна доьлху и зингат? – ца кхетара жима кӏант.

- Боьрша стаг хуьнха вахача, ша́ делкъана хӏума йиъна ваьлча сискала^н цуьргаш бе́цала охьакхуьйсу. Ткъа зудчо схьа а гулла йой цӏа хьо бо́ху йууург цхьа цинц а ца йуьтуш. - Зударша цхьа цуьрг ца йуьтуш, схьагулйой, цӏа хьо, ткъа зингатна хӏумма а ца кхо́чу, цунде́ла доьлху и зуда хьуьнха йеъча, - кхетийра кӏант ба́бас.

- Ба́ба, аса сайх йисина сискала^н цуьргаш кхийса мегар дуй зингаташна? – хаьттира кӏанта.

- Мегар ду де́ра, хӏуйнда ца мега и. Аса-м айса а, йуург аса ларайарах, сайх йисина сискала^н цуьргаш зингаташна а, кхинйолчу а кегийрачу садолчу хӏумнашна бацалахь йуьту. Са́гӏа хир ма йу и, ткъа цулла мелехь дуьнена чохь хӏума дац.
Ребӏатас говза, сихачу куьйгашца, кхи^н болу а ша́ мел беш болу болх санна, йуург тӏоьрмигна чу схьагулйора.