На́на

На́на го сай^н, сийна уьйтӏе, кӏай^н кир тоьхна жима цӏа. Ӏаьна^н йе́хачу буьйсанца, тийналли^н гӏара а хезаш, со цхьаъ цхьалха, ойланашца сай^н, дӏатаьӏина ӏуьллучу су́на, геннара хьиегӏа гӏайгӏа санна йа гергарчу аьзнашца сай^н бе́ралла дуьхьал хӏуьтту дагалецамийн некъашца.

Йуха со а го, жима бер долуш, паднара тӏехь вежаршца ловзуш.

Суьйре хуьлу йа пхьуьйре хан, тхо дерриш тхай^н чохь а, пеша хьалха, йуург йеш, цхьацца узамца хьийза На́на.

Са^н суьрташ серладуьйлу йуха, йуьхь-бос гуш, аматаш; хӏетахьлера хӏоттам а сай^н, бе́ран кхетам, Не́на^н аз.

Цо йеш хилла галнаш а го, нуьйда таӏорца бертиг а къовлуш, текха тӏехь сецна кӏай^н ӏаь, са^н цергех дийлина хи а.

Йуха Не́на^н йелар хеза, кӏай^н цергаш, кӀе́да ши куьг, тхох хӏо́ра а хьостуш цо, доӏанашца дӏавижор а.

Тӏаккха гӏе́наш бе́раллин (куьзган чохь гуш санна) дуьхьал оьху иштта су́на, сай^н хиллачу ловзоргашца.

Ма дарра го ӏуьйранна со (ах гӏе́нах а, самах а волуш), галл-гал а лелхаш, паднара тӏера теса тӏе кха́ча схьаво́гӏуш а. Тӏаккха На́нас саца а вой, охьа лах а луш, мара вохкар, йуха со Не́на^н белаш тӏе корта товжош вижа гӏертар а.

Эхӏ, Хьаби!

Са^н Хьаби, маца, мичахь, хӏу^н некъашца хьодур-кх со лаха цкъа: йесаллин бухбацаре йа стиглан ӏаьршашка!

Дала херрехь, декъалчаьрца хуьлда-кх вай^н вовшийн гар: «На́на йала хьа^н, са^н кӏант!» - аьлла, со хьаста хьо тӏе а хьодуш.