Жима эла чӏогӏа воккхавийра цу балхах. Маржа, и ницкъ болуш хӏара ша хилча! Тӏаккха чубузчу малхах марзо дийнахь шовзткъе доьазза эцна ӏийр вац хӏара, ткъа кхузткъе шуьйттазза оьцур яра я цул а гӏолехь дерг – бӏозза а, ши бӏозза а оьцур яра, и дан, кхуьнан гӏант цхьана меттера вукху метте даха а дезар дацара! Эццахь цуьнан юха а сахьаьвзира, ша цӏахь йитна сайрат дага а еъна, юха шен ерриге майралла гулйина, паччахье дехар дира цо:
– Суна чубузу малх ган лаьара... Хьайн десара,оьгӏаз а ца воьдуш, малхе чубуза алахьа...
– Ас, цхьана инарлина, полла санна, зезаг тӏера зезаг тӏе хуьйшуш волало я трагеди язъе, я хӏордан каркар хила аьлла, омра а дина, цу инарлас и омра кхочуш ца дахь, бехке мила хир ву – со хир ву я иза?
– Хьо хир ву, хьан воккхалла, – цхьана маьӏӏаргонна а шеко ца кхоллалуш, жоп делира Жимчу эло.
– Цӏенна бакъ ду, – тӏечӏагӏдира паччахьо. – Хӏорангара а цуьнан дан ницкъ кхочург деха деза. Шайгахь ӏедал долу нах уггар хьалха кхетам болуш хила беза. Ахь халкъе хӏорда чу кхоссало алахь, цо революци йийр ю. Сан, айса аьлларг кхочушде, баха бакъо ю, далун доцу хӏума айса тӏе ца дуьллу дела.
– Ткъа малх чубузарна хӏун до вай? – дагдаийтира Жимчу эло: ша цхьаъ хаттахь, шена жоп даллалц ӏад ӏаш ӏедал ма дацарий цуьнан.
– Чубузу малх а гур бу хьуна. Ас малхана, чубуза аьлла, тӏедуьллур ду. Амма, цунна чубуза бегӏийла хьелаш хиллалц, собардийр ду ас, и ду и урхалдан хьекъал хилар.
– Ткъа и хьелаш бегӏийла маца хир ду? – хаа лиира Жимчу элана.
– Гм, гм, – жоп делира паччахьо, стоммачу рузмин* агӏонаш а луьстуш. – Иза хир ду хьуна... гм, гм. Тахна уьш хир ду хьуна, суьйрана ворхӏ сахьттий шовзткъа миноттий яьлча. Тӏаккха гур ду хьуна, сан аьллар мел нийса кхочушхуьлу.
Жимчу эло бага гӏаттийра. Дош дац кхузахь дерг а, шена лиъначу хенахь малх чубузуш ган йиш ца хилча! Ма-дарра аьлча, кхуьнан кхузахь кхин самукъадала хӏума дацара.
– Со дӏавоьду, – элира цо паччахье, – ас, кхузахь ӏийна, кхин дан хӏума дац.
– Ма гӏо! – элира паччахьо: шен пачхьалла тӏехь долу стаг карийна, чӏогӏа дозалдеш хиллачу цунна иза дӏавахийта ца лаьара. – ӏадӏе кхузахь, ас министар хӏоттор ву хьо.
– Стенан министар?