«Тамашийна сайрат а ю хӏара-м, – ойлайира Жимчу эло. – Цхьа йокъа йолуш, массо хӏума, мехий санна, массо чам а – дуьра. Адмаш а дац башха геннара хьекъал долуш а, шайга дӏааьлларг юхаалан бен а ца хаьа... Сан цӏахь цхьа зезаг дара – сан бӏаьрсин а, деган а марзо – иза гуттар а ша хьалха дистхуьлура соьга».
Гӏамаршкахула, тархаш юккъехула, лайлахула дукха дӏаихна, эххар а цхьана некъа тӏе кхечира Жима эла. Ткъа массо некъо а адмашна тӏе ма кхачавойца стаг.
– Де дика хуьлда, – элира цо.Цунна хьалха зезагийн дийнна беш яра.
– Де дика хуьлда, – дуьхьал дистхилира розанаш.
Тӏаккха Жимчу эло уьш дерраш а шен зезагах тера хиларан тидам бира.
– Шу муьлш ду? – хаьттира цо, дукха цецваьлла.
Тхо розанаш ду, – жоп делира розанаша.
– Хӏейт-яӏ... – элира Жимчу эло.
Эццахь ша цхьа чӏогӏа воккха пекъар хийтира цунна. Цуьнан хазчу зезаго, ша санна дерг, ерриг анакевна* талларх, карор дац бехира кхуьнга. Ткъа хӏинца кхунна хьалха тӏетохий, тӏерадаккхий хӏума доцуш иза санна долу зезаг духхьалдӏа цхьана бешахь пхи эзар дара!
«Ма дог а детӏар дара-кх цуьнан, хӏинца шена хӏара сурт гича! – ойлайира цо. – Цхьа йовхарш етта долалур дара, ша хӏинцца делла дӏадолу моттуьйтур долуш, юьхьӏаьржа ца хӏотта, хӏуъа дан а кийчча. Дала доьжча санна, цхьа экам лело дезар дара иза, вуьшта боккъал а лийр долуш а ма ду, хӏуъа дина а со юьхьӏаьржа хӏоттийчахьана, суна дагахьбаллам бисчахьана, бен ца хеташ...»
Кхидӏа а шен ойланаш йора цо: «Со а ӏа, дуьненахь цхьанхьа а цхьаьннан а ша санна дерг хила йиш йоцуш цхьаъ бен доцу зезаг ду сайн долахь бохуш, ткъа иза кхинаш санна долу роза хилла. Сан берриг бахам муьлххарг а санна долу и цхьа розий, суна гоьллелц бен ца богӏу кхо тӏам-ламмий, цу тӏе, царех а цхьаъ гуттаренна а хила мегаш цӏехаьлла а болуш, кхин ца хилла-кх... со хӏун эла ву цул тӏаьхьа...»
Иза, бацала дӏа бертал а воьжна, ахӏи аьлла, вилхира.
Эццахь деъана схьакхечира Цхьогал.
– Маршалла ду хьоьга, – элира цо.
– Маршалла хуьлда хьуна а, – гӏиллакхе маршалла схьа а оьцуш, дӏасахьаьжира Жима эла, амма схьагуш цхьа а вацара.
– Со кхуззахь ду, – хезира юха а изза аз. – ӏожа бухахь...