– Кхера, хьаха, лур ву со тховса сарахь...
Юха а, сан сацо гуьнахь доцу цхьа боккха бохам хила боллу-кх бохург хьаьхна, сан дог шелделира. Кхин хезар дац техьа, кхин цкъа а суна хаза доьгӏна дац техьа цуьнан и зевне велар? И велар – пана гӏамар-арахь шовданан декар дара суна.
– Сан жимниг, хьан зевнечу веларе кхин а ладегӏа лаьа суна...
Ткъа цо олу:
– Тховсалерчу буса шо дузу. Сан седа шо хьалха со охьавоьжначу меттигна нийсса тӏехула схьакхетта тховса...
– Ладогӏахьа, сан жимниг, и массо хӏума – и лаьхьа а, и седанца цхьаьнакхета везар а – и дерриге а цхьа ирча гӏан ма ду, дац тӏаккха?
Цо жоп ца делира.
– Уггар коьртаниг – бӏаьргашна ган йиш йоцург ду... – элира цо.
– Ду-те. Дера, ду...Оцу зезагца дерг санна ду и. Хьо цхьанхьа геннарчу седан тӏехь кхуьуш долу зезаг дезаш велахь, мел хаза хуьлу буьйсана стигал тергалъеш. Массо а седано хӏетахь заза доккху.
– Доккху-те. Дера, доккху... Иза оцу хица хилларг санна ма ду. Ахь суна хи малош, и хи, цхьа исбаьхьа мукъам хилла, декара, цӏийза гӏунан чкъург а, муш а бахьна долуш дара и... Дагдогӏий хьуна? Мел чомехь дара и хи.
– Дара-те. Дера, дара...
Буьйсана хьо седарчашка хьоьжур ву. Сан седа ӏаламат жима бу, иза хьуна дӏагайта а таро яц сан. И дикахо а ду. Сан седа – дуккха а долчу седарчех цхьа седа хир бу хьуна. Хьуна седарчашка хьежар дезалур ду... Уьш дерраш а хьан доттагӏий хир ду. Цу тӏе, ас хьуна цхьа совгӏат а дийр ду...
Тӏаккха иза чӏоггӏа велавелира.
Эхӏ, жимниг-яӏ, сан жимниг, ма дог хьосту-кх сан оцу хьан велаваларо!
Сан совгӏат и ду хьуна... иза вайшиннан оцу хица хилларг санна хир ду.
– Муха?
– Хӏора стеган а шен-шен ду седарчий. Бевлла лелачу нахана цара некъ хьоьху. Вукхарна еккъа стиглахь йогу кегий цӏерш ю уьш. ӏилманчашна – кхочушдан дезаш цхьа хьесап ду. Ас вийцинчу гӏуллакхчина – уьш деши дара. Цу массо нахана гергахь, седарчий мотт ца хууш ду. Амма хьан седарчий ша-тайпа хир ду...
– Муха?
– Хьо стигла хьалахьожур ву, ткъа цигахь схьагучу седарчашлахь цхьа седа хир бу, сайн веларца со вехаш, – тӏаккха хьуна массо а седа боьлуш хезар ду. Хьан седарчий дела хууш хир ду! Юха иза ша а велавелира.