– Хӏаъ, уьйраш, – элира Цхьогало. – Цкъа чунна хьо сан хӏун ву – хьо санна болчу бӏе эзар кхечу кӏентех цхьа жима кӏант бен вац-кх. Тӏаккха суна хьо хьашт а вац. Я хьуна со а дац хьашт. Со хьуна гергахь а дац со санна долчу бӏе эзар кхечу цхьогалех цхьа цхьогал бен. Амма ахь со карӏамадахь, вай вовшашна хьашт хир ду. Хьо суна гергахь дуьненахь а цхьаъ бен воцу кӏант хир ву. Со а хир ду хьуна гергахь дуьненахь а цхьаъ бен доцу цхьогал...
– Со хӏинца кхетта вогӏу хьуна, – элира Жимчу эло.
– Дуьненахь цхьа роза ду...схьагарехь, цо со карӏамийнчух тера ду...
– ӏамийна хила там бу, – тӏетайра Цхьогал. – Лаьтта тӏехь ца хуьлуш хӏун ду.
– И Лаьтта тӏехь дацара, – элира Жимчу эло.
Цхьогал чӏогӏа цецделира:
– Кхечу сайрат тӏехь дара?
– Хӏаъ.
– Таллархой буй тӏаккха цу сайрат тӏехь?
– Бац.
– И ду хьуна дош! Ткъа котамаш ?
– Яц.
– Эхӏ! Дурсъаьлла кхачам болуш цхьа а хӏума хирг ца хилла-кх, маржа, кху малх кхетачу дуьненан кийрахь! – доккха садаьккхира Цхьогало.
Жимма ӏийна, юха а шен хьалхалерра къамел дӏадолийра цо:
– Дахар а, лелар а дацара хӏара сайниг-м. Со котамашна тӏаьхьа долу талла, адмаш талла суна тӏаьхьа довлу. Котамаш ерш а цхьаъ ю, адмаш а ду дерш а цхьаъ. Самукъдала хӏума дац хьуна. Амма ахь со карӏамийча, сан дахар, маьлхан зӏаьнарша къагийча санна, серладер дара. Кхечу эзар татанна юккъехь къаьсташ хир дара суна хьан когийн тата. Адам догӏу хезча, со хӏинца, додий, дӏалечкъа. Хьан когийн татано,исбаьхьчу мукъамо санна, со тӏедоьхур дара, хьулделла ӏачуьра арадаьлла, со хьуна дуьхьал хьодуьйтуш. Цу тӏе, – дӏахьажахьа! Дӏо-о, кхаш тӏехь, кхиъна догӏу и кӏа гой хьуна? Со ялта дууш дац. Сан хӏун гӏуллакх ду цу кенашца. Оцу кӏен аренашка бӏаьрг кхарстийна, суна дагадан хӏума дац. Ма дош дац и! Амма и хьан дашо месаш. Мел дика хир дара, ахь со карӏамийча! И дашо кӏа тергалдеш, сан бӏаьргашна хьалха гуттар а хьан сурт лаьттар ду. Цуьнан кенаша мохехь ден шах-шах доггах дезалур ду суна...
Луьйчуьра а сецна, дехха Жимчу элан бӏаьра догӏаделла ӏийра Цхьогал. Тӏаккха цхьа чӏогӏа хьастаделира: