Йолхалгӏа сайрат цул хьалха хиллачул уьттазза йоккха яра. Цу тӏехь вехаш сила-а стаммий киншкаш язъеш волу воккхастаг вара.
–Дӏахьовсийша цкъа! Гезданча* а кхечи схьа! – воккхаверца мохь иккхира цуьнан, Жимчу элах бӏаьрг кхетташехь.
Жима эла стоьл тӏе охьахиира, хьуьхь-воьллачуьра жимма меттаван. Иза дукха леллера ваьлла!
– Хьо мичара ву? – хаьттира цуьнга воккхастага.
– И хӏун нана йоккха киншка ю хьан? – хаьттира Жимчу эло. – Хьо хӏун деш ву кхузахь?
– Со географ ву, – жоп делира воккхастага.
– Ткъа географ бохург хӏун ду?
Иза хӏордаш а, хиш а, гӏаланаш а, лаьмнаш а, еса аренаш а мичахь ю хуу ӏилманча ву-кх.
– Мел самукъне болх а бу! – элира Жимчу эло. – И ду-кх хила ма-деззара гӏуллакх!
Географан сайрат тергалъеш, гобаьккхина бӏаьрг кхарстийра цо. Оццул йоккха планета цунна цкъа а гина яцара.
Хьан сайрат чӏогӏа хаза ю, – элира цо. – Ткъа ӏапказ-хӏордаш дуй шун?
– Цунах дерг суна ца хаьа, – элира географо.
– Э-э, – догдолуш дахдира Жимчу эло. – Ткъа лаьмнаш?
– Ца хаьа, – элира географо.
– Ткъа гӏаланашший, хишший, еса аренашший?
– Уьш ю-яц а ца хаьа.
– Ва, географ ма ву хьо!
– Цундела ца хаьа-кх, – элира воккхастага. – Со географ ву, гезданча вац. Гезданчаш бу суна ӏаламат чӏогӏа цатоьурш. Гӏаланийн а, хин а, лаьмнийн а, хӏордийн а, ӏапказ-хӏордийн, есачу аренийн а лерамаш бийриг географ ма вац. Географ – дукха мехал стаг ву цуьнан кхерсташ лела йиш яц. Иза кабинет чуьра араволуш а вац. Амма цо ша волччохь гезданчаш а тӏеоьцу, тӏаккха цара дуьйцург дӏаяздо.Царах цхьамма цхьа кортболу хӏума дийцахь, географ, цхьаццанхьахула зоьй-хоттий, и дийцинарг бакъхьара стаг ву я вац хьожу.
– И стенна оьшу?
Ва, гезданчас пуьташ боьттина хилахь, географин ӏаматаш тӏехь боккха кегаре хир ма бу. Иза молуш хилахь, и гуттар а далатохар ду.
– Хӏунда?
– Къаьркъанчийн бӏаьргаш чохь гуттар а ши сурт хӏутту дела. Тӏаккха цхьа лам бен боцчохь географо шиъ билгалбийр бу.
– Суна вевзаш цхьа стаг вара... Ма ледар гезданча а хир вара-кх цунах, – билгалдаьккхира Жимчу эло.
– Хила там бара. Ткъа хӏинца, нагахь санна гезданча ша бакъхьара стаг хуьлу-кх, тӏаккха цунна гучудаьлларг толлу.
– Муха толлу? Баха а боьлхий хьовсу?