– Хаза а хеташ-м ӏамор дара, – жоп делира Жимчу эло. – Амма, дависарг, хан кӏезга ю-кх сан. Со хӏинца а доттагӏий каро безаш а, тайп-тайпана хӏумнаш довза дезаш а ву.
– Ахь карӏамийна хӏумий бен довза йиш яц хьуна,– элира Цхьогало. – Адмийн, цхьа а хӏума йовза, хӏинца хан тоьуш ца хуьлу. Шайна эшна хӏума цара туькнахь кийчча йолчуьра схьаоьцу. Амма доттагӏий бухкуш а, оьцуш а туькнаш хуьлуш ма яц, цундела хӏинца доттагӏий боцуш ду адмаш. Хьайн доттагӏ хуьлийла лаахь, со карӏамадехьа!
– Ас хӏун дан деза, хьо карӏамо?
– Уггар хьалха доккха собар долуш хила веза, – жоп делира Цхьогало. – Цкъа хьалха, жимма дӏанехьа а валий, дӏо-о, бацала, охьахаал – хӏаъ, иштта. Со кӏелдӏашхула хьоьжуш, хьо тергалвеш хир ду, амма хьо вист а ма хила. Хабарш оьшуш дац, вовшийн дог хаа, цара мелхо а новкъарло йо. Амма денна жим-жимма герга хуьлуш хаа охьа...
Шолгӏачу дийнахь Цхьогалца ша ӏийначу метте юхавеара Жима эла.
– Хьо вогӏуш, хӏоразза а цхьана хенахь вогӏуш хилалахь, – дехар дира Цхьогало. – Масала, хьо диъ сахьт даьлча вогӏуш хилча, кхо сахьт даьлчахьана дуьйна, со ирсе хеташ, дагах гилгаш дуьйлуш хир ду со. Йиллина хан герга мел гӏоьрти а, кхин а чӏогӏа хир бу сан сатийсам. Диъ сахьт долуш, хьо цаварна кхераделла, синтем байна хьаьвзар ду со. Суна ирсан хама хуур бу! Цкъа цхьана хенахь, тӏаккха вукху хенахь хьо ван воьлча, суна сайн дог муьлхачу ханна кечдан деза хуур дац... ӏадаташ лоьруш хила ма деза.
– Ткъа уьш хӏун ю – и ӏадаташ? – хаьттира Жимчу эло.
– Уьш а ду-кх адмаша тоххарехь дицдинчу хӏумнех цхьаъ, – дийца хӏоьттира Цхьогал. – Билггал цхьа де вукху массо а дийнах, цхьа сахьт вукху массо а сохьтах тера доцуш ден хӏума. Масала, суна тӏаьхьалелачу таллархойн иштта ӏадат ду: хӏора еари де ярташкарчу мехкаршца хелхабуьйлуш, синкъерамашкахь дӏахьо цара. Цхьа исбаьхьа де ду и – и еара! Со, сайн лела арадолий, церан кемсаш тӏе кхаччалц дӏадоьду. Ткъа таллархоша и хелхарш шайн аьтто баьл–баьллачу хенахь деш хилча, массо де а цхьатерра хир дара, сан цкъа а садаӏийла хир дацара.
Жимчу эло Цхьогал а карӏамийра. Тӏекхечира къаста деза хан а.
– Со хьуна сагатдеш, доьлхуш лелар ду, – элира Цхьогало.