Цицига^н кӏорни

Вахит Хаджимурадов

-Мӏау! Мӏау!...- хезира  цунна ӏаьржачу бодана йуккъехула. Мелла а цхьана серлонах тера бес-бесара бӏарлагӏаш-м дара бӏаьргашна хьалха хаза самукъане ловзуш. Амма кхунна мичара  хаа^н дезара иза цӏен, мо́жа, баьццара самукъне хӏозаш дуйла, хӏара-м  хӏинцца дуьнена чу йаьлла жима цицига^н кӏорни йарий. Селхана йина йелахь а хӏинца а бӏаьргаш беллаза йара цицига^н кӏорни, цунна ца хаахь а, иза кхи^н а масех дийнахь бӏаьргаш ца боьллуш ӏен дезаш а йара. «Мӏаьу!.. Мур-р! Мур-р!» - хезира йуха а цицига^н кӏорнина. Иза шеца сел хаза-мерза къамел дийриг а мила ву ца хаара кӏорнина, амма иза дара дерриг а дуьненчохь а угаре самукъне аз, кхунна девзачарех. Цу озана дуьхьала шега хӏинца а дикка дола ца далуш болу корта а айбина дуткъачу озаца  сихонца “Маьу!” аьлла жоп делира кӏорнино. Цунна хаьара, хӏинца шена, бӏагор боуьйтуш мерза йолу, шура хира йуйла. Кестта цуьна^н жимчу коьртах а, букъах а бовха, тӏуьна мотт хье́кхабалан буьйлира. Чӏо́гӏа самукъадаьлла кӏорни ша́ а йуьйлира ше́н шелбелла мера^н буьхьиг улло́хь а́гӏора йаьллачу не́на^н довхачу гайх ӏитта^н. Эххаре а цунна карийра шена кху дуьненачохь йевзина уггаре а мерза хӏума – шура! Ма самукъане меттиг йу-кх хӏара со кхаьчнарг! – ойла хьийзара цицига^н кӏорнин жимачу коьрта чу. Шурех ша́ ӏаьбча, иза не́на^н гайна бухахь йовхачу цӏокана йуккъехь хьулйелла хьаьрччина дӏайижира.”Мур-рр!”- бо́хуш ше́н бовха шога мотт хьоькхуш на́нас хьоьстура ирсе́н жима кӏорни. Гӏе́наха а цициг кӏорнина дуьхьала туьссура горгийн цӏен, мо́жа^н, сийна^н басахь долу гонаш, уьш самукъне ловзура вовшашца.Жима сира уьйриг санна не́на^н гайн бухахь ӏуьллу цицига^н кӏорнин. Наггахьа ког тохабаларх хаалора иза гӏе́наха бес-бесара хӏозашца ловзуш хилар.

Хӏинца а бӏаьргаш белла хан тӏе ца кхаьчначу цицига^н кӏорнина кхи^н гина хӏумма а ма да́цара, иза шена дуьхьала туьйсу^н бес-бесара хӏозаш бен. Делахь а иза дара уггаре а ирсе́н хӏокха доккхачу дуьнена чохь.

Ткъа хан-за́ма сихонца дӏайоьдура, кӏорни а мерза шура сатталца йаарна а, не́на^н безам а бахьана а сихха йоккха хуьлура.