Къонах маца хуьлу

Тешна дара Ӏабдули^н мӏерана тӏе тасабелларг дикка боккха чӏа́ра хилар. Ӏабдулин букъатӏехьаша мӏарин гӏу́ркх схьало́цуш гӏо дира воккха да́дас. Кестта шиммо а говза мӏара хьалаозийна бердана бе́ца тӏе хьала баьккхира мел кӏезига а кийла хир болуш чӏа́ра. Мӏера^н чӏагарна тӏера сиха схьабаьккхира воккха да́дас чӏа́ра. Бе́ца^н йуккъехула кхийсалора чӏа́ра, бетталора хина тӏекха́ча гӏерташ. Кант цецваьлла хьожуш вара. Цунна ше́н да́харехь дуьххьара гуш дара хӏара тайпана сурт. Цо-м ше́н жима куьйгаш цкъа, шозза тӏедехьара цицигана санна чӏе́рана букътӏе хьакха дагахь. Амма чӏа́ра кхи^н а чӏо́гӏа карзаха бо́лура. Эххар а чӏа́ра дӏатийра, и кӏадбелле́ра, ницкъа кха́чийне́ра. Гӏийла ше́н горга бага гӏитточуьра-м ца сацадора цо. Кӏантана-м тарделле́ра и меца бу, цунде́ла гӏийттайо цо бага. Бепига цуьрг йала а гӏоьртира и.

— Воккха да́да, меца буй и? Бага ма гӏийтайо цо, меца болуш санна? — хаьттира Ӏабдуллас.

— Йург лоьхуш тӏе нийсабелла хӏара чӏа́ра вай^н мӏера^н чӏагарна буьххье. Амма бага гӏетторан бахьана кхинарг ду цуьна^н.

— Хӏу^н бахьана ду и, воккха да́да?

— Чӏераша адмаша санна хӏавааца ца доьӏу са, — ша́ са му́ха доьӏу гайтира да́дас. Чӏераша хи бухахь доьӏу са, — кхетавира цо кӏант.

— И му́ха? Хи^н бухахь. Хӏаваъ ма дац!

— Иштта Да́ла кхоьллина-кх уьш.

Кӏант ойла йеш вара, ше́н дуьненахь уггаре коьрта ойла!

— Хӏинца цуьнга са ца деӏало?

— Ца деӏало. Вай и чӏа́ра цӏа а бехьна, цӏан а бина кхорзура бу. И-м цхьа йалгӏо дуьззина хир бу, — э́лира воккха да́дас кӏанте́.

Ше́н да́харехь коьртаниг хаттар дира жимчу кӏанта:

— Воккха да́да и чӏа́ра лийр буй тӏаккха?

Хӏинца кхийтира воккха стаг, кӏанта йеш йолчу ойланах. Хӏинца хӏокху миноте́хь кхоллалуш дара кӏента^н дог, ойла, стогалла, дикалла, цунах хӏокху дуьненахь му́ха стаг хир ву, къонах хир ву, йа вац!

— Лийр бу де́ра и чӏа́ра, — кӏента^н кхоолла йинчу йуьхье а хьожуш э́лира воккха да́дас.

Ӏабдулли^н дагчохь боьдуш къийсам бара, оцу къийсамо къастор долуш дара — дика йа, вон цо къастор долуш дара хӏокху дуьненчохь ша́ латтор болчу къийсамехь, ша́ хоржура болу некъ: нийсо йа харцо!