Бесланан каникулаш

Ирча сурт дара кӏантана хӏинца гуш дериг! Хӏинцца цхьажимма хьалха хаза тӏе́маш а лестош охьахиъна, хазчу боларца болабелла лелла кхокха… Лозийна бетталуш, кагбинчу тӏемо, лозийначу коьрто къиза хьовзийна бара иза.

Уггаре а инзарениг — оцу хазчу кхокхана иза дезарг динарг хӏара ша́ вара, Беслан! Кхокха-м бетталуш леш боллура, схьахетарехь. Му́ха нисдирийра дара ша́ дина зулам хӏинца!

— На́на! На́на! – цӏогӏ э́лира Бесланас ша́ хӏу^н дийр ду а ца хиъна.

Ра́гӏу кӏелхьара беша а́радо́лучу жимчу кевнах схьахаьдира Беслана^н на́на. Цунна-м моьттура ше́н кӏантана цхьаъ вониг хилла. Хийлаза на́нас дитта^н гаьнна тӏера охьаваьккхине́ра иза чувожарна кхоьруш. Хӏинца-м иза чувоьжна ваьлла моьттуш йара на́на.

— Хӏу^н хилла! – кхерайелла хоьттура цо геннара.

Амма Беслан хӏоьттина лаьтташ гича, мела а сапаргӏат хилира иза. Улло́ кхаьчча-м дог ӏовжийра цуьна^н! Кхокханехь болу ба́ла гинчу муьлххачу а дикачу стега^н ца ӏовжадойла а да́цара дог!

— Хӏу^н хилла! Хӏу^н дина цунна? – хоьттура на́нас кӏанте.

Амма Беслан-м ӏадийча санна лаьттара.

— Хьажийтал, и хӏу^н йу хьа^н буйнахь йериг? – кӏента^н буйнара ӏад схьаоьцуш кхийтира на́на хиллачух.

— На́на! Иза лийр буй? Иза леш буй! Адамаш а лей иштта! – не́на^н марахьерчара догдоьхна кӏант.

— Де́ра, адамаш санна лоза ма до кхокхий а, шайолу чохь садо́лу хӏума а! Адмашка санна мохь ца хье́кхало-кх цаьрга! Хӏунда йи ахьа и къизалло! – хоьттура на́нас кӏанте.

Кестта сецира бетталучуьра миска кхокха а. Кӏант га^н ца лууш санна дӏаберзийна гӏийла корта а болуш, диллина дисина чохьсадо́цу бӏаьргаш а до́луш ӏуьллура иза диттан кӏелахь.

Хӏокху хазачу бӏаьста, заздаьлла серлайаьллачу бешатӏехула и кхокха кхи^н цкъа а лелара бац самукъадаьлла ше́н кӏай^н тӏе́маш а лестош хӏаваэхь! Цо кхи^н самукъадоккхур дац адамий^н а, хӏаваэхь жима кӏай^н марха санна гучуболуш, малхехь лепаш.!

2005 шо.