Довта Мартана чохь лийчар

— Гой хьу́на! Ткъа тахана моссалгӏа май ду вайна? – карийра а́ла ма́шарен дош Масийна.

— Массалгӏа? – ца кхийтира Довта.

— Тахана вайна кхоъалгӏа май бен дац! – доггаха цӏогӏ э́лира Масас.

— Хӏу^н ду ца хилча? Хӏара до́гӏуш Марта а ду, лийча даьхкина вай кӏентий а ду! – бӏаьргаша суйнаш туьйхира Довтий^н, тӏера коч дӏайаккха тоха а луш.

— Цхьа, ши кӏира дӏа а да́лийтина йуха даьхкича дика хетара су́на… Шуна му́ха хета? Ре́за дуй шу? – шена а эрна о́луш хеташехь, э́лира Ментас.

— Шуна хезний, вай^н йуьрта йистера бешахь шпанка о́луш йолу хьалха цӏен луш йолу баьллаш хилла о́луш. Цига гӏой вай? Хӏара Марта-м цхьанхьа а гӏу́ра да́цара. Иэцца цхьана, шина дийнахь, вай баьллаш дӏаластайешшехь, хи а дохлура ду, — хӏиллане цхьа бӏаьрг хьабба а беш хьаьжира Маса.
— Боккъала а бо́хий ахьа? Вай^н бешахь шпанка баьллаш цӏен йелла? Ма мерза хуьлу уьш дитта^н гаьнашна тӏехь йохкушехь йууш! – ша́ дӏайоккхуш йолу коч сацийра Довтас.
Масий, Ментий вовшега а хьаьжина, самукъадаьлла велаве́лира.

— Мегара ду, цига а гӏу́ра ду вай, цкъа-шозза Мартана чу а кхетта – ше́н коч дӏайаккха тохаве́лира Довта вуха а.

Ментий, Масий кхийтира шай^н накъост шайга сацалур во́ций, хӏара дуьне тӏе-кӏела даьлча а. Маса керчаш йолчу тулгӏешна улло́ вахара, хина бердана йистехь шуьйра даьржинчу горгачу тӏулгашна йуккъехь тудаш йолчу ше́н ма́чашца когаш раз а луьйзуш. Хи хӏинца а даьржина дара, бе́раша цунна тидам а ца бора. Оцу билгалонах да́има а баккхийнарш а ларлуш, цуьна^н тидам беш а хуьлура да́има а. Хӏунда аьлча, лакхахь лаьмнашкахь догӏа до́гӏуш, Марта даьржина до́гӏура. Амма и догӏа алсама до́гӏуш нийсалахь, Марта тешийтина дистина да^н а тарлуш дара – бӏаьстенахь а, аьхкенан йуккъехь а. Амма Маса ше́н когара туьйдина ма́чаш схьайаьхна йистаха а кхийсина, берзинчу когашца хина йисте чуве́лира.

— Маса, ма валалахь оцу хина чу сол хьалха! — мохь бе́лира Довтина чуьра.

— Мегара ду, хьу́на лаахь со-м ва́лане а вера вац оцу боьха до́гӏучу хина, — ре́за хиларца вухаве́лира Маса.
Мента улло́ веъира Масина, цкъа хине а хьаьжина тӏаккха хаьттира цо:

— Маса хи чӏо́гӏа шийла-м дац, да́ций?