Ма-дарра аьлча...

Хьо хьайна йисина,
Уойлане ладегӏа йаьлча,
Цхьа наггахь, цӀейаккхий,
Со дагаваийталахь.
Хьагбелла сатийсам
Базбелла, совба́ла боьлча,
Сакъуьйлу сингаттам
Хьасталой, хьаийталахь.

Бӏаьстенан зе́загех
Хьаьрчина, йаьржинчу а́рахь,
Ког байбеш, йолайой,
Ӏа́ламе бӀаьрг тохалахь.
Мотт сецна, бӀарлагӀа
Хилла, со йуьхьдуьхьал ва́гӏахь,
ЦӀеххьана, хьой йолчохь
Ла́цалой, ма йохалахь.

Шовда хьа^н когашкахь
Шабаршца мотт бийца даьлча,
СапаргӀатдаккхалахь,
Хьай дагна сох дарба дай.
Дуй баа, хьо саннарг
Со а ву, ма-дарра аьлча,
Кийрара сахаддалц
Безамо вацийна лай…