Не́не

«Къанйаллалц йаьхна кхерч
Дӏатаса атта дац», – бо́хуш,
Хьо йе́ха лаьмнашкахь, –
Йаьхначу, кхиъначу йуьртахь;
Ге́нара, гергара
Некъ эцна хьа́ша-да́ во́гӏуш,
Комаьрша, дог цӏена
Хьа́ша тӏеэцначу кертахь.

Мел хаза хан йара –
Да́харехь йицлойла до́цуш:
Цхьатерра, хи санна,
Барт болу доьзал а кхиъна
(Денош-м дӏадоьдура.
Йист йо́цу марзонаш оьцуш).
Да ӏара там хилла,
Уьйтӏарчу дитта кӏел хиъна.

Шу^н бе́рий^н куьйгашца
Хьа́нала къинхьегам гора,
Йахь-гӏиллакх, сий-ла́рам –
Уьш дара дегнашца лелаш.
Да́харехь хьаштхинде́рг
Да́с, на́нас бе́рашка лора,
Хьехамийн аз гӏиттош,
О́лура: «Варийлаш, бе́раш»…

Вай^н кертах болу некъ
Кхолламо гаьннашка боькъуш,
Цхьаццанхьа кхиссина,
Вай хӏинца цхьаццанхьа де́ха.
Хьо цигахь цхьаъ йиси,
Буйнаца йуткъа гӏаж лоьцуш,
Дӏадевлларш марзонца
Уойланий^н бӏарлагӏашлахь леха.

Ирсе́чу да́хара^н
За́мана^н мерза аз дезна,
Тхан да́ а ӏо́жалло
Хе́наза вадийра шеца.
Геннара забаршца
Мохь бетташ, массарна йезна
Де́^н йиша кхи^н йагӏац –
Самукъне «гу тӏера де́ца».

Гӏа санна, техкина,
Со а кху сай^н гаьн тӏехь ве́ха,
За́мана^н лехамаш
До́гӏанах белшаш тӏе ӏенаш.
Тем бо́цу ойланаш
Тийналлехь лехкало цӏе́хьа, вай^н жима йурт толлуш,
Тӏегулда^н ширделла гӏе́наш…

Дитта тӏехь гулделла
Дог цӏена хьозарчий санна,
Йиш-ваша, гергарнаш,
Дӏадевлларш дегнашца соьцуш,
Вон-дика деанчохь
Гулло вай кӏеззигчу ханна,
Кхуьуш, йа ца кхуьуш,
Жим-тӏамма марзонаш оьцуш.

Хӏу^н де́р ткъа, иштта йу
Минотехь тем бо́цу за́ма.
Массо а дӏахьаьдда,
Дӏадедда и ла́ца гӏерта.
За́мано-м да́харехь
Ше́н каде берг туьссу па́на,
Адамий^н де́харшна
Йо́гӏуш, йа ца йо́гӏуш берта.

Йиш-ваша дицделла,
Дог цаьрга ца кхойкхуш, цкъа а
Цхьа де дӏа ца доьду,
Тешалахь, хьомсара на́на.
Ас сайна даьссаниг
Ца лоьху да́хара^н да́къа;
Дика да^н ма лаьа
Эхьах ца ваггал кха́на.

…Бе́р санна, хьаьстина,
Доккхачу да́́харе ваьлла,
Йуха а ас хьоьга:
«Со волчохь ӏахьара», – о́лу.
«Къанйаллалц йаьхна кхерч
Дӏатаса атта дац», – аьлла,
Са^н лаам ца ло́руш,
Хьоьгара и цхьа жоп до́лу.