Нох, Цӏе, Чоь

***

Ас малхе кховдор ду иллеша этӏийна куьйгаш,
Сай^н когийн о́рамаш тийсина Даймехка^н лаьттах.
Со иштта лаьттар ву, Машар сай^н белшаш тӏехь сецош.
Сай^н бӏаьргий^н чӏенигех ӏийдалуш лаьтта^н мутт-марзо.
Со иштта лаьттар ву, да́хара^н мехаша, саттийна, вакъийна,
Дечига пондаре верззолц.
Тӏаккха ахь, Даймохк, ладо́гӏалахь са^н сина^н мерзе.

***

Са^н не́на^н некхах
Декха са^н некъаш
Хьа^н сица доьзна ца хилча,
Ва́хар а хӏу^н дара, Нохчийчоь,
Долуш сай^н нох, цӏе, чоь,
Хьа^н лаьттахь вина ца хилча?..
Валар а хӏу^н дара, Нохчийчоь,
Хьо тӏаьхьа йуьсуш ца хилча?..

Цхьаалла

Нохчий^н аре лаьмнех хадо гӏертар санна, хета су́на Азех Европа къасто гӏертар а...
Азиний, Европиний йуккъехь вина волчу де́^н цӏий хуьйдда Европин лаьтто, цуьна^н хьацар хуьйдда Азин лаьтто.
Су́на ца хаьа, са^н да́ кхелхинчу дийнах Нохчий^н ареной, лаьмнаший вовшашка кадам муьлхачо хьаьнга бира.
Ӏаьмирко Азина атомни бомбанаш тоьхначу дийнахь Европи^н бӏаьргех даьлла хи гуш санна хета су́на, лаьмнех стаг кхаьрдича, лаьмнашкахь йина йолчу, Нохчий^н аренгахь йе́хаш йолчу сайн не́на^н бӏаьргех даьлла хи гуш.
Са^н ворхӏалгӏа да́ Азехь йа Европехь, лаьмнашкахь йа аренгахь вина ву ца хаьа су́на, амма ас нохчий^н илли о́лучу хе́нахь уьш сох кхетийла хаьа.
Са^н на́нас аренгахь йеттинчу сискала^н а, са^н де́на Европехь йеллачу мидалан а цхьа бос бу - маьлхан бос.
Аренгахь вина волчу су́на и малх ло́махь гина дуьххьара, Азера Европе боьдуш.
Са^н де́^н барма эцна боьлхучу на́хана тӏаьхьа, бӏаьрхиша берзина когаш а багош со ведда воьдучу дийнахь Азиний, Европиний йуккъехь ӏуьллучу тха^н кӏо́тарахь и малх цкъа сецнийла а хаьа су́на, коьртах куьг а хьаькхна тевина, са^н дог е́ца гӏерташ.
Ло́махь ве́хаш волу ше́н кӏант волчуьра цӏа йо́гӏуш йолу тхай^н де́на́на гуш санна хета су́на, хӏо́ра дийнахь и малх гуш.
Нохчий^н аре лаьмнех ха́до гӏертар санна хета су́на Азех Европа къасто гӏертар а.
- Су́на хаьа цунах мал кхаьрдийла...