***

На́нас сахиллалца дов дора йоӏана,
На́нас сахиллалца йоӏ чехайора.
Ткъа а́рахь доьлхура гуьйрена^н догӏанаш,
Хетарехь, ца́ра а къинхетам ца бора
Дахкаро хьулдина дайначу седарчийн,
Урамехь кхерстачу цхьалхачу илланчин...
М а кӏезга дар-кха уьш : на́хана хетаршший,
Ду на́нна моьттуршший, кху йуьртахь хилларшший.
Ма кӏезга дар-кха уьш доккхачу дагна!
Дуьххьара ше́н ирсах тешначу дагна!
Цӏеххьана са а́кха даьллачу дагна,
Луучу бӏаьрхишца мохь тоьхна а́ла,
Сел къиза садетта ницкъ бо́цуш кхии:
"Кӏай^н говр йу бехкениг, кӏай^н говр йу, на́на!
Сирла са хиллалца терсийца и!"

***

Са^н тахна э́шара^н денош ду доттагӏа
Толамаш кха́ненгахь бисна.
Йуха а сай^н кхоллам кхожа тӏе хӏоттабан
Масийтта ӏа́лашо йисна.

Цӏеначу дагара йуха а вирзина,
Дог ӏабош цкъа велавала,
Вистхуьлуш: «Гой шуна, са^н чевнаш йирзина?»
Доллучу къинойх цӏанвала.

Ткъа тӏаккха, са доцчу, кӏезгачу на́хана
Гечдина, веза стаг хилла.
Керла йукъ йихкина керлачу да́харна,
Доладан кхи^н керла илли.

Са^н дин бу терсашберг, некъана гечдина,
Къо́балдеш да́харан туьйра.
Сай^н не́на^н пурбанца шеда кхаж кечбина,
Хуур ву со цуьна^н нуьйра.

Со ва́гӏахь во́гӏур ву, со висахь вуьсур ву,
Бӏешерех чекхваьлла ваьлча,
Жимачу йуьртара мехкарий хьуьйсур бу
Со ва́ре, хан-за́ма йаьлча.

Вовш хилахь, вовр ву со, седанах кхерстина,
Туьйш хилахь, — хӏолламах туьйр ву.
Са^н дин а бо́гӏур бу, ӏуьйренца терсина,
Дохьуш ас йаздина туьйра.

Ахь тӏаккха дешалахь, цхьа могӏа биц ца беш,
Во́цучу доттагӏчуьн да́хар,
Адамий^н бӏаьрхишца тӏадамаш хӏиттадеш,
Дерзийна хӏо́ра а дакъа.

Дешна хьо ваьлча, ахь и дин дӏахецалахь
Къонахий лелачу новкъа.
Сох бисна шеда^н кхаж хьай^н кара е́цалахь,
Хьа^н куьйгахь — са^н куьйга йовхо...

Са^н тахна э́шара^н денош ду, доттагӏа,
Делахь а со чӏо́гӏа тешна,
Тӏаьххьара кхолламна йуьхь-дуьхьал хӏотталца,
Ца къаьстий тоьлларг йа эшнарг.