Цициган кӏорни

Цунна-м ца оьшура кхи^н хӏокха дуьненачохь кхи^н хӏумма а, иза иштта а йара ша́ ирсе́н ло́руш. Амма цхьана дийнахь цицига^н кӏорни мерза шура а йиина набарна тевжинчуьра самайаьлча цунна кхи^н ца гира ше́н хӏинццалца самукъадоккхуш долу бес-бесара хӏозаш. Иза цӏеххьана хиллачух чӏо́гӏа кхерайелла йисира, ӏадийча санна. Цуьна^н бӏаьргашна хьалха гуш йара ах сахьайелйеллачу инзаре йоккхачу багахь могӏа бина йолу ира йаккхийра цергаш.
“ К-х-х! “- аьлла букъ а саттийна, ше́н жимачу цӏоганах хӏоз бина, дуьхьала тасайала^н дагахь, кечйелира цицига^н кӏорни. Амма оцу цергашна йуккъехула цӏеххьана а́рабеанчу цӏен басахь бовхачу матто кхуьнан бӏаьргаш тӏехула хьакхалуш дуьне серладаьккхира. “Мур-р-р!”-аьлла хьастаро кхерайаларна чуьрадаьлла са йуха меттада́лийра. ”Хӏара хӏу^н ду су́на гуш дериг, стенга дахана са^н бес-бесара гонаш? – цец деина йисине́ра цицига^н кӏорни. Амма сиха дицде́лира цунна ше́н хӏозаш, гонаха хьаьжича. Хӏара хьоьстуш бара не́на^н баьццара хаза ши бӏаьрг, доккхачу корехула чухьожуш бара тӏехь бӏаьрг ца сацалуш хаза мо́жа боккха го-малх а. Йоккхачу паднарна тӏетесина ӏуьллучу йоккхачу кӀе́дачу гоьна тӏехь шорта меттиг бара ловзан а. “Хӏара дуьне-м цхьана гонех лаьтташ ма ца хилла!”- самукъаде́лира цицига^н кӏорнин. Уггаре а хьалха не́наца ловза^н дуьйлира иза, амма кестта и ловзар а дитина доладе́лира иза шена гонаха гуш долу доккха дуьне довзан, иза ӏамон. Йуьхьанца-м паднар бен йа́цара цуьнга таллалура йолуш, амма кестта, цхьажимма йоккха хилчхьана тешна дара, иза кхи^н а ге́на йериг хилар – малхо серладаьккхинчу доккхачу дуьнене. 

2004шо