Ребаӏат. Бакъ дийцар

Хӏара колхозан кӏа чохь долчу амбарна, текхина буха а йахана, ӏуьллуш йара. Иштта нисделле́ра: амбар йина а, дӏахӏоттийна йара тӏулгех бинчу бух тӏехь. Амбаран цӏенкъа стаммий^н аннех йина йара. Тӏулгех бинчу бухана йуккъехула, адамаша ло хьаьшина ларош йитиначухула, текхина амбарана буха а йахана ӏуьллуш йара Ребаӏат. Шеца буру дара цуьна^н, га́ли а… Буруца амбаран цӏенкъа йуккъехь нийсалура долуш ӏуьрг а даьккхина, оцу ӏуьргахула охьадо́гӏучу кӏах га́ли чу цинцаш ӏийдош ӏуьллура и. Жимчу ӏуьргах дукха ца до́гӀура кӏа охьа, саца а соцура наггахь. Тӏаккха зудчо чана чимхалг а ӏуттий охьадоийтура кӏа. Уохьадо́гӏчу кӏана кӏела кана а ло́ций, схьаоьций кӏа ӏовшура цо, мацалла мелла а ӏехайеш.

Мостагӏчо санна го лаьцна: шелоно, мацалло, цамгарша къиза, къинхетам хӏу^н йу ца хууш, хьокхуш бара нохчий, гӏалгӏай! ӏен меттиг бо́цуш, лаьттаха тоьланаш а йаьхна, ше́ло́нах кӏелхьа́ра бовла гӏерташ бохкура уьш, мацалло, ша́ и мангало буц санна, хьокхура, цамгарша ун даржийна шийла таӏазар латтадора! Де́ де́не мел де́ли а, тоьланашна чуьра а́рабовлуш кӏезига нах бара, «ӏожалли^н йурт» гӏийлачу узарший^н эшарехь Де́ла^н доӏийца леш йара!

Ребаӏат а́ра йаьлле́ра: мацалла йелча а,  хехочун тоьпах йелча а бен башхала а йац, аьлла. Масех километр гӏаш схьаихине́ра и ше́ло́на тоха са до́цуш, тӏехь шийла йолуш, ло доккха долуш, цо а шена къиза дуьхьало йеш.

Ше́н майр Хьуьсена^н Зойрбек дийна волуш, цо йаьккхинчу тоьлана чохь дийна дисина мацало кӏела дитина ши бе́р, ши йоӏ Зийний, Кебист йара цуьна^н. Тӏаьххьара висина кӏант Шамсуди а, Зойрбек санна мацало, цамгаро, ӏожало дӏаэцне́ра. Шамсуди а, ше́н да́ Зойрбек санна кхераван, къарва^н стаг ва́цара хӏокху дуьнена чохь, амма хӏокху дуьнена йистехь, хӏокхарна цкъа а ца гиначу ше́ло́нца, цамгаршца болчу къийсамехь ийгира уьш. Шаьш а мацало лаг а лаьцна, шай^н кегийрачу цӏенойн лаппагӏаршна чохь ӏаш болчу казахий^н багара тӏаьххьара рицкъа ца доккхуш, шай^н оьздангалех ца бухуш, «ӏожалли^н йуьртахь», шаьш хала Де́ла^н ницкъаца йаьхначу тоьланаш чохь, болуш мохь, аз, арз до́цуш леш бара нохчий^н оьзда нах!

Нохчашкара Совета^н ӏедало, Сталинас схьа а даьккхина, шайна дӏаделла даьхни а къуьйсуш, хӏокхара ӏаьнонна кечдина дечиг а да́гош, хӏокхеран довхачу цӏеношна