– Ас айса хьаладоккху хи, – элира ас, – хьоьга балур болуш болх бац хӏара.
Ас, меллаша хьала а даьккхина, гӏун тӏулган гонан йиста тӏе дикка дӏанисдеш, чийлак охьахӏоттийра. Сан лерехь тӏаккха а лаьтташ яра цӏийзачу семан и ша-тайпа йиш, чийлак чуьра хи а дара дегочуьра сацаза, цу чохь ловзуш маьлхан зӏаьнарш гора.
– Цу хих къурд бан хьаьгна ву-кх со, – элира Жимчу эло. – Хи малийтахьа соьга...
Дукхахболчарна шаьш лоьхург хӏун ду а ца хаьа... Со кхийтира, цо лехнарг хӏун хилла!
Ас чийлак цуьнан бете даьхьира. Цо хи мелира, бӏаьргаш дӏа а хьабдина. Мерзачу дааршца, маларшца хӏоттийна уггар исбаьхьа той санна дара и хи маларан сурт. Цо молу и хи мух-мухха а хи дацара. Тӏехьуьйсуш седарчий а долуш, бехха бинчу некъах, семанан цӏийзарх, сан куьйгаша хьегначу къих хьаладаьллера иза. Иза хьан дагна хилла совгӏат дара. Со жима волчу хенахь ӏийса пайхамар дуьненчу валар даздечу деношкахь суна деш хилла совгӏаташ лепара оцу нуьрехь: базалга тӏехь летийначу чӏурамийн сегарехь, буьйсанан юккъехь дечу ӏийдехь* лоькхучу органан* эшарехь, адмийн эсал елааьшнаихна яххьаш гарехь.
– Хьан сайрат тӏехь, – элира Жимчу эло, – еккъа цхьана бешахь пхи эзар роза кхиадо адмаша... хӏетте а шаьш лоьху ирс ца кардо...
– Ца кардо, – тӏетайра со.
Ткъа цара лоьху ирс деккъа цхьана розанца, цхьана хин къурдаца каро йиш ма яра...
Цӏенна бакъдерг ду и, – тӏетайра со.
Тӏаккха элира Жимчу эло:
– Бӏаьргаш бӏаьрзе ма ду. Хӏума, дагца хьаьжна, лаха деза.
Ас а мелира хи. Кийра ӏаббош дара садеӏар. Сатоссуш, гӏум а хӏутту дашо бос оьций дӏа, ша моз санна. Цундела а вара со ирсе, дог доккхадеш. Ткъа ма-дарра аьлча, воккха ца ве а, догдоьхна хила а хӏун дара кхузахь хилла!..
– Хьайн дош кхочушдан деза ахь, – элира Жимчу эло кӏедда, веъна суна улло охьа а хууш.
– Хӏун дош?
– Дага ца догӏу хьуна, ахь, сан ӏахарна... муцӏархъюллург йийр ю ма аьллера... Со сайн зезаган ӏу ма ву.
Ас айса дехкина сурташ хьаладехира. Жима эла, цаьрга а хьаьжна, велавелира:
– Копастанех ма тера а ю хӏара хьан баобабаш...
Ткъа со, сайн дагахь, и баобабаш сайна боккха юьхькӏам хеташ ма вуй! Иза юха а велавелира.