Къиза ду хьан туьйра...

Къиза ду хьа^н туьйра,
Ткъе пхоьалгӏа шо.
ӏаьржа-Хожа — гуьйре,
Хӏинца туьйли хьо.

Сенаш долу ма́ха
Пхьуьшах боьллина,
Да́ха накъост-да́хар,
До́цург кхоьллина.

Де́ра жӏаьлеш-мархаш
Лета некъах са^н.
Хӏокху Нохчий^н махкахь
Со ву цхьалха стаг.

Малхах йоьлуш лета
То́ба хьаргӏаний^н.
Нах а хьуьйсуш хета
Сайга кхардаме.

Амма хаьа, йоца
Хиларх къо́на хан,
Йамартлонаш йоцчохь,
Воций къонаха.

Йуха новкъа ваьлла,
Илли э́р ду ас —
Ирса^н цӏарах баьлла
Хир бу бӏе мукъам.

Кӏента^н ницкъ а гул бай
Некъан бохалла.
Йуха тасалур вай
Хе́нан йо́халла