Цкъа мацах, цкъа мацах хьалха
Кхетамза ахь къастийна
Илланчий^н къийсаме да́хар
Ворхӏ басахь цо къа́гийна.

Кхи^н цхьаъ а йеза гӏулч йаккха
Гӏаттор ву хьо къийсамо!
Кхи^н цхьаъ а лекха гу баккха
Ойур ву хьо сийлалло!

***

Къора ву со, къора ву — и хьа^н къурдаш хаза.
Бӏаьрзе ву со, бӏаьрзе ву — и хьа^н бӏаьрхиш га^н.
Ирча ву со, ирча ву — хьо йу дукха хаза,
Хьа^н-м хӏинца а таро йу хьайх дозалла да^н.

Су́на лаарх ца хили хьох са^н цӏе́ра^н на́но,
Хьу́на лаарх, ца хили сох хьа^н цӏе́ра^н да́.
До́ла до́цуш ширдели са^н куралли^н гӏама,
Хе́на^н цӏаро йа́гайин гӏабали а хьан.

Кхерч лато ӏеми хьо, тхов тӏекхетта баьлча.
А́кха новкъа во́лу со ӏуьйре де́къалйа.
Некха^н йуккъехь къуьйлу ас йамартлонан шаьлта.
Къора ву со, бӏаьрзе ву, мотт а сецна са^н.

Гуьйре

Дешнаш — гӏаргӏулий^н.
Мукъам — са^н не́на^н.
Дӏаолу — Даймахко.

БУЬЙСА

Жӏаьлий^н летар дашадо догӏанаша.
Дитташа дечу доӏанаш а йовзуьйту буьйсана^н гӏайгӏа. —
Ца́ра йекхна ӏуьйре йоьху.
Мох, шел а белла, дӏабижна.
Мархаш паргӏата йежа кӏо́тархойн кхашкахь.
Чиркхаш набарна детта.
Го́танна кӏамделлачу ахархойн куьйгашна гӏе́наш го.

***

Хьо су́на хьа́рам йу — и дешнаш дуу ас хӏинца,
Со му́ха кхе́та кху да́харо хӏоттинчу киртигах?
Хьо су́на хьа́рам йу — и дешнаш дозу са^н цӏийца,
Са^н некъийн энаш тӏехь дагардеш дицда^н мел гӏиртинарш.

Хьо су́на хьа́рам йу, назбара^н аьхналла санна,
Беттаса^н когийн бен кхи^н тата до́цучу буьйсанна,
Хьо су́на хьа́рам йу, шайтӏанна беза дуй санна,
Ткъа хӏунда кхолламо вай^н некъаш, цхьа берд беш дуьйцина?

Хьо су́на хьа́рам йу — лазаман тӏаьххьара дийцар
Кхерстарца доьшу ас дешначохь хьа^н когийн чӏурамаш.
Хьо су́на хьа́рам йу — и дешнаш лозу са^н цӏийца,
Лозу са^н кхе́тамехь хьо лелла, хьо лела урамаш.