Жимачохь цӏе́рачех лечкъина гӏала ва́хане́ра тхойшиъ...
— Хьажахь, э́лира сан накъосто, тар тесинчуьра со меттах а воккхуш, — ма та́машийна хӏума а ду-кх хӏоккхул йоккхачу гӏа́лахь, чу а ва́хана вохвала вевзаш стаг вац бо́хург.
— Де́ра ду-кх дукха та́машийна хӏума-м, — э́лира ас, йуха а на́барна дӏа а туьйш.
Буьйса шийла йара, вокзалиэхь адамаш дукха делахь а.
На́баро со гӏелвечу хе́нахь су́на хезаш хилларг дикторан аз дара. ӏуьйранна со набарха ваьккхинарг а дара дикторан аз. Цо кхайкхадора, 6 сахьт даьлча Москва — Баку цӏерпошта схьакхо́чуш йу, бо́хуш. Цо хаийтира тхойшиъ дӏавоьду хан а тӏекхаьчнийла. Вохвала дагахь троллейбуса чохь дӏатарвелча ас хаьттира накъосте:
— Хьу́на гӏан гирий?
— Ца гира.
— Су́на-м гӏе́нах говраш гира сийсара.
Уьш хӏаваэхь сахиллалца тирсира.
Беттан кӏа́жарш санна, кхесаш йаржийна,
Уьш ловзура зезагашлахь йаьржина.
Лаьмнаш набарх девлла цеце хьуьйсура,
Иэхӏ, ма дукха ца́ра су́на дуьйцура...
Хӏинца, масийтта шо даьллачул тӏаьхьа,
Иштта наггахь кхойкху соьга геннара
Нохчийн йуьртахь ловзуш дисна бе́ралла.
Су́на кхин цкъа а гира говраш — троллейбуса наьӏарехула дӏахьаьжча, йоккхачу гӏа́ли тӏехула дайн уьдура кӏайн лаьмнийн кортош.