Жӏаьлеша йаа хьо, набаран гӏовла...

Жӏаьлеша йаа хьо, на́бара^н гӏовла,
Ма карзахдевли хьа^н самеца гӏе́наш!
Да́ велла йиса хьо, чо́меца ойла,
Ма карзахйе́ли хьо хан йоцчу хе́нахь!

Вай^н да́хар-м моз дара, ша́ даа хиъча,
Хьаргӏана^н стимал ша́ къахьлахь а наггахь.
Синтем а хир бара, лехамаш тийча,
Цхьаболчу на́хана мегашдерг магахь.

Ткъа со-м ца мегийца, хӏу^н ду а хаан,
Со сайна ца вевзаш, йуха а гӏаттар,
Со сайна ца мегаш, са-гӏо́ра хаддалц,
Бӏарзвелла дӏаэхар, тилвелла латтар.

Са^н куьйгех-м гӏоьмаш дац — тутмакха^н духар
Ткъа хӏунда тарло те́ тангӏалкхех дитташ?
Хӏо́ра а корера схьа тоьпаш ту́хуш,
Со ва́ла доьгӏна те́, данзадерг дитна?

Хир ду и ӏуьллур вац шийлачу лайлахь,
Дӏавовр ву, кӏур хилла, бӏешера^н кийрахь.
Кӏо́тархой-м хьуьйсур бу, ца хууш тайна,
Мила ву адама^н синтемо вийнарг.

Кӏо́тархон-м ӏохкур бу ца хууш шайна
Илланча леш вуйла хӏо́ра а буса,
Хӏо́ра а буьйсанна, цхьалли^н хьу лайна,
ӏожаллех во́лий и меца са дуза.

Кӏо́тархой-м ӏохкур бу хан йоцчу хе́нахь,
Ца гуш са^н гӏевланга хӏоьттина бӏешо.
Чо́меца ойланаш, самеца гӏе́наш,
Шух хила доьгӏна хир-кх дуьненан э́шарш!