Нохчий^н мотт

Азаллин кийрара Гаттийна,
Дуьйцина, дош дашах хоьттина
Кхолламо шегарчу йолана
Нохчашна мотт белла, до ладан.

Ше́ло́нан ткъевнечу къахкаре,
Йовхона^н тевнечу кхехкаре,
Тӏехь боцчу бехкамех тийсина
Нохчий^н мотт садаккха кхийсина.

Човхийна, дош а́кхадаьккхина,
Нохчичун долара баьккхина,
Бистхуьлуш лаьттахь ца хазийта,
Нохчий^н мотт, га тоьдуш, лазийна.

Кхолламе кхоамза хьешийта,
Даймахке сатуьйсуш, хьегийта,
Дитт хьокхуш, ирйина, туьйсина,
Харцонаш йуьхьдуьхьал тийсина.

Пелоно гӏелбина латтабарх,
Халоно меженаш сеттайарх,
Дош доьхна, до́цург ца дийцина,
Доьналли^н хьаьркаш ца хийцина.

Хьакъхилла бистхила, денбелла,
Марзонийн уьйрашка гулбелла,
Нохчий^н мотт когаш тӏе хӏоьттина,
Даймехка^н да́ хилла гӏаьттина.

Назмана^н шовкъе́чу байташкахь,
Мукъамий^н зевнечу айдаршкахь,
Чкъор тилла, ца буьйлуш берзина,
Нохчий^н мотт дай^н кхерча бирзина.

Къонахийн ойланех боьттина,
Ма́шара^н гӏароле хӏоьттина,
И бека нохчичу^н хье́къалехь,
Ца хила йиш йо́цуш де́къала.