Жӏаьлеш дӏалоьхку ас...

В. Высоцкийн безамна

Жӏаьлеш дӏалоьхку ас, жӏаьлеш дӏачехадо,
Борз а йац дуьхьала хӏуттуш.
Делахь а, тӏекхойкхуш, ас пхьуй ца ӏехадо,
Доьшана метта дӏовш дуттуш.

Со царех воьлла вац, со царех ваьлла вац,
Амма ву борз кийра йоьлла.
Мискъал а дуьненахь цхьа илли аьлла ас,
Со хӏеттехь кӏезанел тоьлла.

Жӏаьлеша цистина са^н динан бе́ргаш а,
Са^н ше́раш астагӏа девлла.
Ас бе́рза^н кӏецаш гуш, къийлина цергаш а
Йаийна, кха́чинна йевлла.

Ас дина^н ког ларбеш, диттина хьостамаш
Са^н дагах чекхдевлла дохку,
Делахь а ца лекъа са^н сина^н хьостанаш —
Гитара ворхӏ мерзан мохк бу.

Цу мехка^н мерз хьабеш цистинчу куьйгашца,
Велла а, ас илли э́р ду.
Оьрсеха! Хьа^н даьӏний^н, хьа^н моьний^н уьйрашца
Со йуха дуьнен чу ве́р ву.

Йуха а гӀо́ттур ву, жӏаьлеш дӏачехадеш,
Лардан хьа^н сийлалли^н борза.
Мотт бо́цуш ва́гӏахь а хьа^н бакъдерг хьехадеш,
Сатесна цхьа гила борз га^н.