Гӏезаман ӏелий, Туллам-Огӏой

— Со-м во́гӏур вац, жа-м дуьгуьйтур ду ас, — аьлла, жоп делира Гӏе́зама^н Ӏе́лас.

Жа а лаьллина, уьш дӏабахара. Цул тӏаьхьа уьш гучуьра дӏа а бовлийтина, шен говрана нуьйр а тиллина, Гӏе́зама^н Ӏе́ла хаьхкина цӏа вахара. Пхьоьханахь хиъна ӏаш волчу шен де́га э́лира цо:

— Да́да, хьо цӏа ва́гӏахь ара, хьоьца гӏуллакх дара са^н.

Да́ цӏа ца веара. Не́не э́лира цо, наьрташа́ жа а дигна, цӏа веана со, кхузткъе кхо пха кечбе су́на, аьлла. Ткъа ша́ секхаӏад кечдан волавелира иза. На́нас тӏаккха хьехар дира цунна:

— Схьавоьл, хӏума кхаллал, цкъа кхаьллина йуург ткъанна^н метта йу хьу́на, шозза кхаьллинарг — шовзткъанна^н метта йу хьу́на, кхузза кхаьллинарг — кхузткъаннан метта йу хьу́на, аьлла.

Логал чоьхьа йо́луш, ца йо́луш кхузза хӏума а кхаьллина, иза царна тӏаьхьа ваха кечвелира. На́нас э́лира цуьнга:

— Хьо йуьртара дуьйна чехка водахь, тӏаьхьа а кхиъна, кхера а велла, цӏа веънарг хир ву хьо, йуьртах а́раваллалц, меллаша водахь, йуьртара дуьйна меллаша вахара иза, тӏаьхьакхиина хир вац, э́р ду хьу́на.

Йуьртах валлалц, меллаша а вахана, тӏаьхьа шен говр дӏаэккхийтира цо. Вухахьаьжначу уггаре а осалчу наьртана гира дӏадетташ долу суйнаш. Наьрто хаьттира ша́йн коьртачу наьрте́:

— И йо́гӏу цӏераш, хӏу^н цӏераш йу? — аьлла.

— Гӏе́зама^н ӏе́лин говран бергаша туьйсуьйтуш суйнаш ду уьш ла́манах дӏадетталуш дерш.

— И дӏадетташ долу дохкк, хӏу^н дохкк ду?

— Гӏе́зама^н ӏе́лин говран мерӏуьргах схьадетта дохкк ду иза, — аьлла, жоп делла наьрто.

— Жа дӏа а тасий, довда вай? — аьлла, йуха а хаттар дира цо.

— Довда мегар дац, цӏа кхаьчча, Туллам-Огӏос дойур ду вай, кхузахь соьвцча, Пезама^н Ӏе́лас дойур ду вай, — аьлла, жоп делира наьрто.

Тӏаьхьакхиъначу Гӏе́зама^н Ӏе́лас кхузткъе кхо пха тоьхна, кхузткъе кхо наьрт вийра, шен жа схьа а даьккхина, шен гӏотанера хӏумнаш схьа а эцна, шен да́ ве́хачу меттиге, цӏа вахара Гӏе́зама^н Ӏе́ла. Цӏа кхаьчча, Гӏе́зама^н Ӏе́лас шен де́га э́лира:

— А́рахь воьвзина чӏо́гӏа гергара стаг вара са^н, Туллам-Огӏо бо́хуш, цига ваха пурба лахьа́ра ахь.

Цуьна^н де́харна жоп а делла, да́с иза новкъа ваьккхира, Туллам-Огӏо волчу вахийта.