Лаьттар йу хӏоккхахь...

Лаьттар йу хӏоккхахь...
Кхолламо готтачу
Дуьненан чухчаре хьийзош,
Йилбазий^н пӏелгаша
Ирйина ка-маӏарш къийзош,
Дегӏаха дӏакъасто,
Йисина син-оьзиг ийзош,
Йаьхне́ра Нохчийчоь
Тӏехьдоцчу къиноша хьийзош.

Шалхонца кхийдачу
Шеконех синхьаам бо́цуш,
Лерг диллал тешамца
Ладо́гӏа цхьа кха́не йо́цуш,
Йахь йолчу дегӏах чекх
Луурийн са́гайтар до́цуш,
Йаьхне́ра Нохчийчоь
Тӏекховда къинхетам бо́цуш.

Бо́лата^н тӏум хилла,
Дахчинчу дегӏан са детташ,
Дилхала йийшина,
Хьегӏачу чевний^н даӏ ӏеткъаш,
Хьогӏа^н бӏаьрг боьгӏначий^н
Сатийсам кагбина лаьтта,
Нох тассал - кхи^н до́цу,
Турпалчу Даймехка^н латта.

Малхбале, малхбузе,
Букъ сеттош, суждане хӏуьтту,
Хьа^н сийдеш, дуьненан
Кийрара довха аз гӏуьтту,
Къийсамий^н а́ганахь
Къонахий кхиийна латта,
Хьа^н дегӏан кхолламан
Дӏадевлларш ца хилла атта.

Стигланий^н шораллехь
Кхозучу хьа^н тхевнах летта,
Ба́ланий^н буйнара даьллачу
Сина ма-хетта,
Хьа^н ойла хьаьстина,
Лепар ду седарчийн бӏаьргаш,
Лам-корта айбина,
Хьо маьрша хьоьжур йу цаьрга.

Зевнечу иллеша
Кӏа́жаршца дуьйцина кочар,
Хьакъдина, за́мано
Нохчийчоь да́има хӏоккхехь,
Лаьттина, лаьттар йу
Доьналлехь дуьненал йоккха...