Мискачу стеган кӏант

Мискачу стега^н кӏант

Цхьана мискачу стега^н цхьа кӏант хилла. Ша́ валале, да́с весет дина кӏанте:

— Варий, варий, аса ца аьлла, о́лийла дац хьу́на, куьйсачу стагана балха ма хӏотталахь, куьйса стаг сутара а, тешам бо́цуш а хуьлу хьу́на, — аьлла.

Да́ веллачул тӏаьхьа, кхи^н да^н хӏума а ца хилла, чухӏотта цхьана йуьрта вахана кӏант.

Дуьхьалаваьлла кхунна цхьа куьйса стаг.

— Ахьа хӏу^н леладо, жима кӏант? — аьлла, хаьттина цо.

— Со-м цхьанна чухӏотта бо́хуш веъне́ра, — аьлла кӏанта.

— Со ву-кх балха хӏотта стаг лоьхуш, — аьлла куьйсачу стага.

— Хӏа^н-хӏа, куьйсачу стагана балха ма хӏотта, аьлла, весет дина соьга са^н да́с, аьлла, дӏаволавелла кӏант.

Тӏе кхи^н бедар а йуьйхина, дехьахула хьаьвзина веанчу тохарлеррачу куьйсачу стага хаьттина кхуьнга:

— Ахьа хӏу^н леладо, жима кӏант? Хьо ма лела? — аьлла.

— Со-м болх лоьхуш ма лелара, — аьлла, жоп делла, хӏумма а шек во́цуш кӏанта.

— Со ву-кха балха хӏотта стаг лоьхуш, — аьлла куьйсачу стага.

— Хӏа^н-хӏа, куьйсачу стагана балха ма хӏотта, аьлла, весет дина соьга са^н да́с, — аьлла кӏанта.

Дехьо ваьлла хӏара воьдуш, кхи^н духар а дуьйхина, веана дуьхьал а ваьлла, йуха а тохарлеррачу куьйсачу стага хаьттина:

— Ахьа хӏу^н леладо, кӏант? — аьлла.

— Болх лоьхуш лелара со-м, — аьлла кӏанта.

— Со ву-кх балха хӏотта стаг лоьхуш, — аьлла куьйсачу стага.

— Ванах, шу дерриге а куьйса-м дац хӏокху йуьртахь мел дерш а? — аьлла, цецваьлла кӏант.

— Ду де́ра, — аьлла куьйсачу стага.

— Делахь, со хьу́на балха хӏоттаза вер вац-кх. Бинчу балхана йал мел лур йу ахьа? — аьлла кӏанта.

— Вайшиннах хьалхе дохковаьллачо лур йу йал: атйокх йеккалц даош-малош кхо́бур ву ас хьо. Ре́за вуй хьо? — аьлла куьйсачу стага.

Оцу тӏехь барт а хилла, кӏант кхунна балха хӏоьттина. Цӏа ма-кхеччи, къуйсачу стага аьлла кӏанте:

— Хӏара ворда а йожий, хьайца хӏара э́р а еций, дечиге гӏо вайна. Э́р эккха-еккхачу эккхар ву хьо хьай^н ворданца.

— Дика ду, — аьлла, вахана, дечиг а дахьаш, э́р лелх-лелхачу а лелхаш, цӏа во́гӏуш хилла кӏант. Шай^н ке́тӏа ма кхеччи, дахана э́р, ке́тӏарчу утарми^н ӏуьргах чекхъиккхина.