– Стенан министаррий... юстицин.
– Кхузахь дов хатта стаг ма вац!
– Хӏун хаьа, – вуй а, – реза ца хилира паччахь. – Хӏинца а ерриг а теллина яц сайн пачхьалкх. Со къанвелла, пайтон лело мохк тоьуш бац сан, ткъа гӏаш лела гӏора дац...
Жимчу эло, охьа а таьӏна, хӏокху сайратан важа агӏо толлуш, кхин цкъа а бӏаьрг кхарстийра.
– Ас телли! – элира цо маьхьарца. – Цигахь а вац!
– Делахь айхьа-хьайна е кхел, – элира паччахьо. – Иза уггаре халниг ду хьуна. Ша-шега барт хатта нахе хоьттучул дуккхазза а хала ду. Ша-шена кхелъян хаар – и ду хьуна уггаре доккха хьукма*.
– Сайна кхел соьга миччахь а ялур ю, – элира Жимчу эло. – Цунна илла а билла а шу долчохь виса оьшуш дац.
– Гм, гм... – элира паччахьо. – Хӏокху сан сайрат тӏехь цхьанхьа бехаш къена мукдахка бу моьттуш ву со. Бус-буса цо мӏараш туьйсуш ен гӏовгӏа хеза. Оцу къеначу мукдехкан дов хатта мегар дара ахь. Цхьа хан масазза ели цунна юх-юха кхел кхайкхае. Иштта, хьох доьзна хир ду цуьнан балар-бисаран гӏуллакх. Айхьа кхел масазза йин а, юха цунна гечдеш хила веза, къена мукдахка кхоо беза, иза цхьаъ бен бац вайн.
– Цхьанна а вен кхел кхайкхор йолуш вац со. – элира Жимчу эло. – Цу тӏе, сан дӏавоьду хан тӏекхаьчна.
– Хӏан-хӏа, ца кхаьчна, – дуьхьалвелира паччахь.
Жима эла новкъа вала кийчча вара, амма паччахьан дог дохо а ца лаьара цунна.
– Хьан воккхалла, айхьа тӏедуьллу хӏума дуьхьало йоцуш кхочушдойла лууш хьо велахь, – элира Жимчу эло, – ахь цхьа кхочушдан атта, кхетаме омра дича, бакъахьа дара. Масала, цхьана минотна а хьем ца беш, сихха новкъа вала аьлла, тӏедилла мегар дара ахь суна... Суна хетарехь, и омра кхочушдан хазнехасанна дика хьелаш ду хӏинца кхолладелларш...
Паччахьо хӏумма а ца элира, тӏаккха Жима эла дӏаваха ийзалуш цхьана юкъана сацавелира, юха доккха са а даьккхина, дӏа новкъа велира.
– Ас сайн геланча во хьох! – сихха тӏаьхьа мохь туьйхира паччахьо.
Ма майра вара-кх хӏинца цуьнан и омра кхочуш ца деш ӏен ваьхьнарг аьлла, хоьтуьйтуш дара оцу минотехь цуьнан хьажар а, ӏар а.
«Хӏаъ, тамашийна къам ду и баккхийнаш», – элира Жимчу эло ша-шега, шен новкъа дӏа а воьдуш.