Жимчу эло Цхьогал а карӏамийра. Тӏекхечира къаста деза хан а.
– Со хьуна сагатдеш, доьлхуш лелар ду, – элира Цхьогало.
– Хьо хьо ду-кх бехке, – элира жимчу эло. – со хьуна лазам хинболу хӏума дезаш вацара, хьуна хьайна лиира, ас хьо карӏамадойла...
– Дера лиира, – элира Цхьогало.
– Хӏинца хьо доьлхуш лелар ду-кх!
– Дера, лелар ду.
– Делахь-хӏета, ас хьуна бинарг бала бу-кх.
– Бац, – реза ца хилира Цхьогал, – соьга кхаьчнарг зовкх ду. Кӏен дашо кенех ас хьайна дийцинарг дагдаийта.
Цхьа хан елира, иза кхин дист ца хуьлуш. Тӏаккха цо тӏетуьйхира.
– Вало, оцу розанашка хьажа кхин цкъа а. Хьайн роза – дуьненахь а цхьаъ бен доцург дуйла, хуур ду хьуна. Сан ӏодика ян хьо юхавеъча, ас хьуна цхьа къайле йовзуьйтур ю. И сан совгӏат хир ду хьуна.
Жима эла розанех бӏаьргтоха вахара.
– Шу цуьрриг а сан розанах тера дац, – элира цо цаьрга. – Шу хӏинца а доцчун меха ду. Шу шаьш цхьамма а карӏамийна а дац, аш карӏамийна а дац цхьа а хӏума. Хьалха сан Цхьогал а дара иштта. Бӏе эзар кхечу цхьогалех иза схьакъаьсташ цхьа а башхалла яцара цуьнан. Амма ас цуьнца доттагӏалла тесира, ткъа хӏинца иза дерриг дуьненахь а цхьаъ бен доцу Цхьогал ду.
Розанаш, эхь хетта, цӏийделира.
– Хаза-м ду шу, делахь а – деса ду, – шен къамел дӏадора Жимчу эло. – Шайн дуьхьа цхьаъ вала а реза хиллал деза дац шу. Тӏехволуш бӏаьрг кхеттачо сан розанна а, дӏадаккха я тӏетоха хӏума доцуш, иза ша тап* шу санна дерг ду, эр дарий а дера хаьа суна-м. Амма шу массарех а и цхьаъ дӏалур дацара ас. Ас хӏора дийнахь цунна ма диттина, шуна ца диттина хи. Буьйсана, аьнгалин пхьегӏа тӏеюьллий, ас дижош лелийнарг а иза дара, шу дацара. Ас иза ма лелийна, кирхьа лоьцуш, мохах лардеш. Ас цуьнан дуьхьа ма дойура нӏаьний, полларчий хилийта, ши-кхоъ бен ца буьтуш.
Цо леткъамаш беш а, дозаллаш деш а ладегӏна ас, иза дист ца хуьлуш дӏатийча а, дегӏна цуьнга ла, цо хӏун дуьйцу техьа бохуш, цуьнан дагара хаа гӏерташ. Иза – сан ду, цундела суна деза а ду, хьоме а.
Юха Цхьогал долчу схьавеара Жима эла.
– Марша ӏойла, – элира цо.