Хаьа иза дукха а́кха буйла,
Карадарх а маьӏна, бахьана,
Хаьа иза дукха цхьалха буйла,
Хаьа буйла шийла, бахьара.

Хаьа, амма хааро ца кхачош,
Лаам бу са^н — лазам, йилбазмохь.
Йелха аьлла, хе́нан бӏаьрса кхачош,
Баржа аьлла, доькъуш дилха дог.

Хаьа, леларх дикчу не́ха^н го гуш,
Веларх, велхарх, вузарх кха́чанах,
Ирсе хиларх, со кху лаьтта^н бо дуй,
Висахь де́дай^н кхерча кха́чанза.

Ас цунде́ла хоьтту хӏокху буса
Лаьтте́, нахе, хьанний^н гӏайгӏане,
(Со мел ве́ха, и цхьа хаттар ду са^н,
Тӏулгал тийна, бӏаьрхил кхайкхаме):

Мичхьа ӏа хьо, де́да ваьхна ирзу,
Мукъам белхош попан, баганан?..
Гӏалехначу лай тӏе ӏена гинсу,
Буьйса йуьйлу бетта^н багара.

* * *

ӏуьйре йо́гӏу кортаӏуьйра
Когашӏуьйра гӏаьтти малх!
Эхӏ, са^н туьйра, бе́ра^н туьйра,
Хьоь ладоьгӏуш техка малх!..

Ас сатесна цига кха́ча, ,
Схьакарайа бетта^н хьех.
На́на, лохьа наьӏар-ма́чаш,
Со дуьненах ве́р ву чекх.

Су́на батто дуьйцуш хезна,
Бо́хуш, бу цхьа па́на мохк,
Цкъа а стега^н дог ца лезна,
Цкъа а ганза марха-дохк.

Шира хьех йу оцу махкахь,
Генех деши ӏийдалуш,
Шена бухехь цӏузам лакхахь,
Стега^н даго доьххург луш...

Со гӏу́р, на́на, и хьех лехна,
Цуьна^н генах шедаг йа^н,
Цунна бухехь э́шар лекхна,
Дагахь мел дерг кхо́чушда.

И ас лоькху шедаг хезча
Хийца лур ду са мел дерг.
Ирсе хир ву дог мел лезнарг,
Доьлуш хӏо́ра на́на, бе́р.

Ма́шар хир бу сийна стигла,
ӏаьржа латта де́ладеш,
Адамашкахь хир ду гӏиллакх,
Бертахь беркат де́бадеш.

Ма́чаш йоьхна, когаш ӏуьйра,
Со воьрзур ву тӏаккха цӏа.
Эхӏ, са^н туьйра, бе́ра^н туьйра,
Ахь мел хьехнарш кхо́чушда!

* * *

Хьа^н кор а до́гур ду, цу буса санна,
Шелдина лай^н чимаш хьийзочу мохо.
Букъ йуккъе тӏехьашха урс ту́хуш санна,
Хӏинца а хезаш берг цу коран мохь бу.

И цӏа а лаьттар ду, ца девзаш санна,
Биц ца беш шена чохь цкъа баьгна безам.
Исс неӏалт воьдучу соь кхайкхош санна,
Хӏинца а го су́на цу цӏийна^н хьежар.

Латта а хьийзар ду, ца хууш санна,
Адамо адаман ӏодика йиний.
Цхьаъ цхьаннах ца кхетча ницкъ ешча санна,
Седарчий оьгур ду, доьлхур ду илли