Эла Тепсаркъий, Жоьра-Бабин Жонсаркъий

Сов чӏо́гӏа кхеравелла, ша́ хӏу^н дийр ду а ца хуъш, вада а ца луш, висна э́ла Тепсаркъа. Тӏаккха кхи^н кхо де даьлча, ло санна кӏай^н чопаш йуха тӏейоьвлла хӏордана. Кӏай^н чопаш шена йайча, саца меттиг бо́цуш, чӏо́гӏа хазахетта э́ла Тепсаркъина.

Цхьа хан йаьллачул тӏаьхьа, бӏаьрго ма лоццу дукха хӏонс йахьаш, Жоьра-Баби^н Жонсаркъа тӏе а ваьлла, хӏонс-говраш хьалха а лаьхкина, цӏе́хьа бирзина уьш. Ца́ра йа́лочу хӏонса^н до́ла дечу говрий^н ӏуйшца кхо цӏоькъа айгӏар хилла: цӏаста санна цӏен, кӏора санна ӏаьржа, ло санна кӏай^н.

Оьхуш, тоъал хӏорш ге́на боьвлча, Жоьра-Баби^н Жонсаркъа волчу агӏорхьа тӏехьаьдда цӏаста санна цӏен цӏоькъа айгӏар. Хьожа йуккъе ше́дан кхаж тоьхна, Жоьра-Баби^н Жонсаркъас йухачовха бешшехь, э́ла Тепсаркъина тӏе а хьаьдда, цунна тӏоьхулла дехьа а кхоссабелла, хӏорда чу бахана цӏоькъа айгӏар.

Кхоьруш, кест-кестта тӏехьа йухахьоьжуш во́гӏучу э́ла Тепсаркъас, цхьа йукъ йаьллачухула, аьлла Жоьра-Баби^н Жонсаркъе:

— Дӏо́ вайна тӏаьхьа бо́гӏу бода, хӏу^н бода бу-теша, ма чӏо́гӏа тӏетаьӏна бо́гӏу иза?

— Иза-м вайна тӏаьхьа во́гӏу говрий^н да́ вара. Дӏа а къаьстина, йаханчу айгӏаро хаам бина цуьнга. Хьалхара ре́ма лоллур йу ахьа, йа тӏаьхьара орца йухатухур ду ахьа? — аьлла, вистхилла Жоьра-Баби^н Жонсаркъа, э́ла Тепсаркъе.

— Аса хьалхара ре́ма лоллур йу, — аьлла, ре́ма а лаьллина, дӏаволавелла э́ла Тепсаркъа, тӏаккха Жоьра-Баби^н Жонсаркъа тӏамана кеч а велла, бухасецна.

Герга гӏоьртина говрий^н да́, ӏаьржа Хожа.

— Хӏа^н-хӏа, Жоьра-Баби^н Жонсаркъа, — аьлла цо, — хӏинццалц хьа^н да́с хьийзийна тхо, хӏинца хьо а волавелла тхо хьийзо. Тӏом болабе хьайна хӏинца.

— Во ӏаьржа Хожа, дог де́ра а хьо ву, сина саготта а хьо ву, йуьгуш йолу ре́ма а хьа^н йу.

Болабе хьайна тӏом, ӏаьржа-Хожа, — аьлла Жоьра-Баби^н Жонсаркъас.

Уозийна ӏода^н пха тоьхна ӏаьржачу Хожас Жоьра-Баби^н Жонсаркъина. Хожас ӏад озошшехь, нуьйра хӏоьа чуьра хьалакхоссавелла, кхо-пхийтта аьрша ирхвахана Жоьра- Баби^н Жонсаркъа. Тӏаккха йуха чувоггӏушехь, Хожин ӏода^н пха кӏелхула чакхбалийтина.