* * *

Со йинчу дийнахь…
Марчонна йуьхьигаш
Тега дӏадолало ӏа́лам.
Со йинчу дийнахь
Делха дӏадолало те́зетахь да́хар.
Со а йоьлху цуьнца
Со йинчу дийнахь
Мел ба́ла барз бо́цуш беллачу не́ха^н
Са^н синна тӏе дуьжу,
Со йинчу дийнахь…
Къинтӏера довлалаш, доттагӏий.
Со тойнехь шайца ца ӏарна,
Со йинчу дийно,
Дуьненчу а да́лаза
Хьийзинчу са^н сина^н мохь
Са^н лере кхоьхьу,
Со йинчу дийнахь…
Йина де са^н да^н а дац,
Са^н са а дӏадоьду.
Дуьненчу а да́лале лазийначу
Са^н сина йина де хуьлу?
Со йинчу дийнахь…
Той дицдой, миска са
Дӏадоьду Гӏум-Азе делха…
Со йинчу дийнахь…
Йина де-м са^н да^н а дац,
Амма ду – дуьненчу да́лаза
Са дийна де…
Гӏелйеллий хьо? Кӏадйеллий хьо?
Хьайн корта са^н кара биллий,
Цхьа жимма садаӏахьа,
Цхьа жимма дог дастахьа…
Са маьрша, дог довха,
Куьг цӏена Нохчийчоь!..

* * *

Дӏайелла неӏарш, дӏайелла!
Кхи^н цхьа седа а
Дӏабай хьа^н стигла́ра,
Кхи^н цхьа узар дели
Хьа^н кийрара,
Цхьа каш совдели,
Кхи^н цхьа чурт тӏекхийти
Хьа^н латтана.

* * *

За́ма! Ма сихйелла йоьду хьо
Ла ца ду́гӏуш са^н дехаре,
Са^н лозучу сил а хьалхайаьлла,
Са^н ӏийжачу дагна тӏоьхула йаьлла,
Ма сихйелла йоьду хьо,
Ма сихйелла йоьду хьо,
Хьайн тулгӏешлахь со
Ма йигахьа со а́найистан до́зане.

* * *

Хӏу^н дийр ду? Да́хара^н лай хилла
Деха вай хӏо́ра а,
Хӏаллакво-кх ӏедало дӏааьлча
Бакъ долу дош,
Цунде́ла ницкъ бо́цуш йисина-кх со,
Сай^н дагца къийса,
Леча а хьожийца, кечделча ше́н тӏе́маш, стигла.
Оф-фай, ма гӏелйелла со,
Доттагӏа, цхьажимма ойлайеш,
Сацахьа соьца.
…Да́харо техкадо кху хе́на^н Ширделла а́га,
Харцоно гӏелбина бо́дане ше́н гаьнгали.

* * *

Тоийта!
Ма де́ и кӏезга къамелаш:
Дӏо́ дехьа – йалсаманехь бе́ха нах,
Дӏо́ цигахь – ма луъу ког хеца хьайна,
Нохчийчоь – дош дац и.