Кхо ваша а, саьрмик а

Кхо ваша а, саьрмик а

Да́с кӏантана вониг хьоьхур дац.

Цхьана де́^н кхо кӏант хилла. Да́с, ша́ ва́лале, весет дина хилла кӏенташка:

— Хӏокху вай^н махка тӏера дӏабоьдуш кхо некъ бу шуна. Ца́рах ширчу новкъа ма гӏолаш, — аьлла.

Мацца а цкъа, хан йаьлча, шай^н да́ веллачул тӏаьхьа, а́раваьлла дӏавоьдуш, цу ширчу некъа тӏе кхаьчна кӏенте́х уггар воккханиг.

— Вахана хьожур ма ву со, хӏокху некъа тӏехь хӏу^н ду, — аьлла, дӏавоьдуш хилла хӏара, новкъа а хӏоьттина. Дуьхьалбаьллачу саьрмикeо хаьттина кӏанте́:

— Ахьа хӏу^н до, кӏант, хьо cтенга воьду? — аьлла.

— Со-м цхьанхьа а ца воьду. Тхан да́с, ша́ ва́лале, весет дине́ра, хӏокху новкъа ма гӏолаш, аьлла. Иза хӏунда аьлла хилла-те́ цо, бо́хуш, хьажа веъне́ра со-м, — аьлла кӏанта.

— Хьайн да́с бо́хучух а ца тешаш, веъна хьо?! Аса гойтур ду хьу́на кхузахь дерг-м: илли о́луш, хьо сол ца толахь, аса бер бу хьа^н болх. Хаьий хьу́на илли а́ла? — аьлла, хаьттина саьрмико.

Кӏанта, ца хаьа шена илли а́ла аьлча, кхаьллина саьрмико и кӏант.

Тӏаккха цуьна^н шолгӏа волу ваша вахана оцу ширчу новкъа, цигахь хӏу^н ду хьожур ма ву ша́, аьлла.

Цуьнга а, илли а́ла хаьий хьу́на, аьлла, хьаьттина саьрмико.

Ца хаьа шена аьлча, кхаьллина цо иза а.

Шен вежарий цӏа бахка хьебелча, кхоалгӏаниг, уггар жиманиг вахана царна тӏаьхьа.

Воьдуш, хӏара а саьрмик болчу кхаьчна, вукхаьрга санна, хӏокху кӏанте а дӏахьедина:

— Илли аьлла йа туьйра дийцина, хьо шел ца толахь, ша́ бер бу хьа^н болх, — аьлла.

— Дика ду. Ша́ туьйра дуьйцур ду хьу́на, — аьлла кӏанта. — Бакъду, дуьйцуш лаьтташ, вовшашна йукъагӏертар дац вай, дуьйцург чекхваллалц, дийца вуьтур ву вай. Нагахь йукъагӏортахь, иза эшна ву вайх. Ткъа со толахь, са^н ши ваша схьалур ву ахьа, — аьлла кӏанта.

Цу тӏехь барт а хилла, кӏант дийца волавелла:

— Стохка ӏай хӏордана бинчу ша тӏехь говрий^н ре́ма йа́жош вара со. Кхано бе́цах йуьзначу говрий^н хи мала дезаш хилла, диг деттарх дагарца и исс аьрша стомма ша́ боха а ца белла, дагарх цӏе йиллира аса, ша башо. Цӏе а летта, са^н диг, шах ӏуьрг а доккхуш, хи чу дахара, дага тӏехь а йуьсуш.