– Йохо йиш йоцуш ю цхьа раж, – элира соьга тӏаьхьо Жимчу эло. – ӏуьйрана хьалагӏаьттиний хьо, юьхь-куьг дилина а, битаме веъна а ваьллий хьо, – сихонца дӏахӏоттий битаме ялае хьайн сайрат а. Денна а асардан деза, уьш зезагийн коьллех схьакъаьсттарг хиллачул тӏаьхьа, баобабаш дӏайохуш: къона зӏийдигаш-м церан вовшех къасталуш а ца хуьлу. Иза кӏордош болх бу, амма хӏумма а хала бац.
Хӏуъа дай а, ша дийцинарг сурта тӏехь гайта хьажа, цуьнах шаьш долчура бераш кхеттарг аьлла, тӏе а диллира цо суна.
– Мацца а цкъа арадевлла лела дезаш меттиг ягӏахь – элира цо, – царна карор ду хьуна и. Цхьаболу болх-м тӏаьхьататта а мегар ду, башха зен хир дац. Амма баобабаш тӏера хьан бӏаьрг дӏатуьлий, – дӏадаьлла хьуна. Суна цхьа сайрат евзара, малонча вара цу тӏехь вехаш. Шен хеннахь асар а ца дина, дӏаяккхаза кхо колл йиснера цуьнан...
Жимчу эло хилларг ма-дарра схьа а дуьйцуш, ас оцу сайратан сурт диллира. Нахана хьехамаш бар бӏаьрга дан дезаш вац со. Амма кӏезга нах бу, баобабаш мел кхераме ю хууш, ткъа иштта стаг цхьана астероид тӏе кхачахь, цунна царех бала хир бу, бала чот йина вер воцуш бу; цундела вуьйхи-кх со сайн гуттар а долчу собарх. «Бераш! – боху ас. – Ларлолаш баобабех!» Мацах суначул башха царна шайна а буй ца хууш, дукха хенахь дуьйна царна кӏело йина ӏа бохам сайн доттагӏашна дӏабовзийта лаьа суна. Цундела хьегна ас хӏара сурт дуьллуш оццул къа а, я хьегна дохко а ца ваьлла. Аш хатта тарло: хӏара баобабаш тӏехь дерг санна, сила-а долу сурташ хӏокху киншки тӏехь кхин хӏунда дац? Цхьа атта жоп ду сан и хаьттинчунна дала: со дилла–м гӏиртира, амма гӏуллакх ца хилира. Ткъа баобабаш дохкуш, оцу сурта тӏехь со гайта гӏерта гӏуллакх луьра а, кханенга тетта йиш йоцуш а дуйла хааро ницкъ лора суна.
Маржа, Жима эла-яӏ! Жим-жима кхеташ, со эххар а кхин цхьана хӏумнах а кхийтира: мел сингаттаме а, гуш хӏума доцуш а хилла хиллера -кх хьан дахар. Еххачу хенахь хьан самукъдаьхнарг цхьаъ хилла – малхбузар тергалдеш, цунах марзо эцар. И суна хиира доьалгӏачу дийнан ӏуьйранна, ахь сайга аьлча:
– Суна чӏогӏа хазхета, малхбузуш цӏийелла стигал. Волохьа, малх дӏа муха бузу хьажа вайша.
– Тӏаккха, собардан дезар ду.