– И цӏоькъаш а схьадахкийта-кх, со кхоьруш дац хьуна церан мӏарех.
Сан сайрат тӏехь цӏоькъаш дац, – иза кхето гӏоьртира Жима эла. – Цу тӏе, цӏоькъаша буц а ца юу.
– Со буц яц, – элира зезаго гӏийлла.
– Къинтӏера далалахь...
– Хӏан-хӏа, цӏоькъаш суна кхераме дац, амма со ӏаламат чӏогӏа кхоьру чуччамехех. Кирхьа хир дацара вайн?
«Орамат чуччамехех кхерар... и ма тамашийна ду-у» – ойлайира Жимчу эло. – Хала амал а ю кху зезаган-м».
– Суьйре тӏееъча, муцӏаркуй санна, цхьа хӏума тӏейиллий, со дӏахьулделахь. Дукха шийла ю кхузахь. Чӏогӏа аьхна йоцуш планета ю. Со схьадаьллачу махкахь ...
Ша долийна къамел цо чекх ца даьккхира. Кхуза кхочуш, иза хӏу-буьртиг бен ма бацара. Кхечу дуьненех цунна хӏумма а хаа йиш яцара. Хьекъале хӏума дац ша дукха атта гучуваьн волчу меттехь аьшпаш боттар!
Заббари жимма юьхьӏаьржа хӏоьттира, тӏаккха цкъа а, шозза а яйн йовхарш туьйхира цо, мелхо а Жимчу элана, иза шена хьалха мел бехке ву дӏахоуьйтуш:
– Мича даха техьа и кирхьа а?
– Со иза схьадан ваха-м воьллера, амма хьо къамел дина даллалц гӏойла ма дацара сан!
Тӏаккха цо кхин а чӏогӏа туьйхира йовхарш: «Дӏа дагахьбаллам хила хьайна! – бохург дара и Жимчу эле. – Со-м цомгаш хилла дели хьуна!»
Жимчу элана и исбаьхьа зезаг дукха-м дера дезаделлера, шен хуьлчух, хаза а хеташ, цунна ӏуналдан а, цуьнан гӏуллакхе хьажа а кийча а вара, хӏетте а цхьана шеконаша кестта дог къийзо долийра цуьнан.
Шега аьлла мел деса дош а цунна дагах кхетара, тӏаккха ша цхьа чӏогӏа декъаза стаг хийтира цунна. Эрна ладегӏна хиллера ас цуьнга, – элира цо соьга цкъа цхьа цӏенчу даггара. – Зезагаша дуьйцучуьнга цкъа а ладегӏа мегарг ца хиллера. Цаьрга хьоьжуш ӏен везаш хиллера, церан архьах* кийра бузош. Сан зезаго мерзачу архьах юьзнера сан ерриг сайрат, ткъа суна цуьнан пусар дан ца хиира. Цуьнан оцу цӏоькъех, церан ирчу мӏарех долу и къамелаш... Цара сан дог дашо дезаш дара, ткъа со мелхо а оьгӏазвахара... Кхин цхьана хӏуманна даре а дира цо: