«Ас сайн инарлина хӏордан каркар* хилар тӏе диллича, – олура цо, – юха инарлас и сан омра кхочуш ца дича, иза цуьнан бехк хир бац, сан хир бу».
– Со охьахаа мегар дарий? – аьлла, хаьттира Жимчу эло, шена эхь хетташехь.
– Ас тӏедуьллу хьуна: охьахаа! – жоп делира паччахьо, шен горнастайн чо болчу обанан цхьа тӏам курра шена тӏе хьала а озош.
Амма Жима эла цо лелочух дикка ца кхетара: хӏара сайраталг дукха жима ю. Кхузахь хӏун пачхьал лелор ду?
– Хьан воккхалла, – вистхилира хӏара, – хатта мегар дарий хьоьга?
–Ас тӏедуьллу хьуна: хатта! – элира паччахьо.
– Хьан воккхалла... мичахь ю шун пачхьалкх?
– Массанхьа а, – доцца жоп делира паччахьо.
– Массанхьа?
Паччахьо шуьйрра куьг тесира, я и цуьрриг доккха хӏума а ца хеташ, цкъа шен сайрат а, тӏаккха мел йолу сайраташ а, седарчий а юкъа-лоцуш, хӏара ю-кх шен пачхьалкх бохучу кепара.
– И дерриге а шун ду? – юха а хаьттира Жимчу эло.
– Ду, – жоп делира паччахьо.
Хӏунда аьлча, иза дерриг ӏедал шегахь долу паччахь вара, цхьа а дозанаш, бехкамаш хӏун ю хааза.
– Седарчаша а до аш аьлларг? – хаьттира Жимчу эло.
– Дера до, – жоп делира паччахьо. – Седарчаша дӏааьлла а далале кхочушдина кардойту шайна тӏедиллинарг. Сайн аьллар тӏера довлар ас царна могуьйтур а дацара.
Жима эла чӏогӏа воккхавийра цу балхах. Маржа, и ницкъ болуш хӏара ша хилча! Тӏаккха чубузчу малхах марзо дийнахь шовзткъе доьазза эцна ӏийр вац хӏара, ткъа кхузткъе шуьйттазза оьцур яра я цул а гӏолехь дерг – бӏозза а, ши бӏозза а оьцур яра, и дан, кхуьнан гӏант цхьана меттера вукху метте даха а дезар дацара! Эццахь цуьнан юха а сахьаьвзира, ша цӏахь йитна сайрат дага а еъна, юха шен ерриге майралла гулйина, паччахье дехар дира цо:
– Суна чубузу малх ган лаьара... Хьайн десара,оьгӏаз а ца воьдуш, малхе чубуза алахьа...
– Ас, цхьана инарлина, полла санна, зезаг тӏера зезаг тӏе хуьйшуш волало я трагеди язъе, я хӏордан каркар хила аьлла, омра а дина, цу инарлас и омра кхочуш ца дахь, бехке мила хир ву – со хир ву я иза?
– Хьо хир ву, хьан воккхалла, – цхьана маьӏӏаргонна а шеко ца кхоллалуш, жоп делира Жимчу эло.