– Хӏаа, иштта жима а ма бац хӏара... – элира цо, корта агӏор а баьккхина, сурт тергал а деш. – Хьажахьа! Набкхетта-кх...
Жима эла вовзар иштта нисделира сан.
Со хенан жерахь ца кхийтира, иза кхуза мичара ваьлла. Жимчу эло ша ден хаттарш ӏанаоьхура, ткъа шега цхьаъ хаттахь, цунна и хезара моьттуш а вац со. Цо цхьацца дуьйцуш, ларамаза юкъаэккхачу дашах, жим-жима кхуьуш кхиира со доллучух а. Цкъа иштта, сан кеманах дуьххьара бӏаьрг ма-кхийтти (кеманан сурт дилла со гӏертар вац, сан цунах хӏета а вета а гӏуллакх хир доцу дела), цо хаьттира:
– Хӏара хӏун вилткӏоз ю?
– Хӏара вилткӏоз яц. Хӏара кема ду. Сан кема. Хӏара тӏемадолу.
Юха сайна кема лело хаарх а дийцира ас, гӏеххьа дозалла а деш. Цуьнан чӏогӏа самукъделира:
– Муха? Хьо стиглара чувоьжна?
– Хӏаъ, – элира ас, и-м башха доккха хӏума а дацара бохург санна, цхьа бен доцуш.
– И ду хаза!..
Жима эла, вахь-хьа-хьа аьлла, мохьтоьхха велавелира, сан чӏогӏа дог а датӏош: сайна хуьлу хьовзамаш беламе бохуш, хазхеташ вац-кхи со. Жимма ӏийна тӏетуьйхира цо:
– Хьо а ву-кх, хӏета, стиглара воьссина. Ткъа муьлхачу сайрат* тӏера?
И хилла-кх хӏара кхуза, хӏокху пана гӏамар-аренга кхачаран со тӏаьхьа ца кхуъу къайле! – аьлла, дагдеана, ас даррехь хаьттира:
– Делахь-хӏета, хьо-хьо кхечу сайрат тӏера веъна хила везаш ву-кх кхуза?
Амма цо жоп ца делира. Сан кемане а хьоьжуш, цо гӏийлла корта ластийра:
– Кху тӏехь-м башха генара веънехь, тамаш бу хьо.
Цул тӏаьхьа вехха шен цхьа ойланаш еш ӏийра иза. Тӏаккха, киснара ас биллина ӏахар хьала а баьккхина, цу жовхӏаран бӏаьравогӏавелла лаьттира. Шу кхета хир ду-кх, оцу кхечу «сайратийн» хьокъехь жимма къадийна цо аьллачу дашо сан духе кхиа лааран шовкъ мел карзахъяьккхина хила еза. Цунах дерг со алссам хаа а гӏоьртира:
– Хьо мичара воьссина кхуза, жима къонах? Мичахь ду хьан цӏа? Хӏара сан ӏахар мича бига воллу хьо?
Жимма ойлане вахна ӏийначул тӏаьхьа:
– Ма дика ду, ахь суна яьшка елла, буьйсана цу чохь охьабуьжур бу сан ӏахар, – элира цо.
– Дера бу. Хьо дика лелахь, ас хьуна и дийнахь дӏабехка муш а лур бу. Хьокха а.
Жимчу эло хьаьжъюккъе шад хӏоттийра:
– Дӏабехка-а? Дӏа хӏунда боьхку?