Цунна ца хаьара, паччахьаш дахаре шайна ма-луъу атта хьоьжуш нах буйла: цаьрга хаьттича, массо стаг церан пачхьалли кӏел ву.
– Схьатӏехилал, хьайх дикка бӏаьрг тохийтал соьга, – элира паччахьо, хьанна хилла а цхьаннан паччахь хила шен таро хиларна, чӏогӏа кура а волуш.
Жима эла, охьахаа меттиг хир яцара техьа аьлла тӏехьа хьаьжира, амма паччахьан горнастайн чо болчу исбаьхьчу обано ерриг сайрат кӏелхьулйинера. Кхуьнан латта дийзира, оццул чӏогӏа гӏелвелла воллушехь... Юха, шен ойла дӏаяхханчохь, кхо бага гӏаттийра.
– Паччахь волчохь багагӏеттор ӏадатца догӏуш дац! – элира паччахьо. – Ас доьхку хьуна багагӏеттор.
– Ца хууш нисдели сан, – элира Жимчу эло, эхь хетта цӏий а луш. – Ас дукха беха некъ бина, цуьрриг а набйина а вац.
Делахь ас багагӏеттор тӏедуьллу хьуна, – элира паччахьо. – Дукха шераш ду, суна цхьамма а бага гӏеттош ганза. Суна ган а, хаа а дика ду и. Валал, ийза а ца луш, бага гӏаттаел! И сан омра ду.
– Со ийза ца ло... сан кхин хьашт дац бага гӏетто – вистхилира Жима эла, верриг цӏий а луш.
– Гм, гм... Тӏаккха... тӏаккха ас хьуна тӏедуьллу бага цкъа гӏаттор, юха ца...
Паччахь ша а тилира ша дуьйцучух, гӏеххьа оьгӏаз а вахара иза тӏаккха.
Паччахьна уггар мехалдерг – ша тӏедиллинарг сихха кхочушдеш хилар ма ду. Шен аьллар тӏера валар цо ловр дацара. Иза дерриг ӏедал дуьззина шен карахь долу паччахь вара. Амма иза дукхе-дукха эсал, дика стаг вара, цундела цо цкъа а, кхетаме, хьекъале дерг бен, цхьа корта боцу омраш дан а ца дора.
«Ас сайн инарлина хӏордан каркар* хилар тӏе диллича, – олура цо, – юха инарлас и сан омра кхочуш ца дича, иза цуьнан бехк хир бац, сан хир бу».
– Со охьахаа мегар дарий? – аьлла, хаьттира Жимчу эло, шена эхь хетташехь.
– Ас тӏедуьллу хьуна: охьахаа! – жоп делира паччахьо, шен горнастайн чо болчу обанан цхьа тӏам курра шена тӏе хьала а озош.
Амма Жима эла цо лелочух дикка ца кхетара: хӏара сайраталг дукха жима ю. Кхузахь хӏун пачхьал лелор ду?
– Хьан воккхалла, – вистхилира хӏара, – хатта мегар дарий хьоьга?
–Ас тӏедуьллу хьуна: хатта! – элира паччахьо.
– Хьан воккхалла... мичахь ю шун пачхьалкх?
– Массанхьа а, – доцца жоп делира паччахьо.