Тобанна хьалха лаьттачу Къосама илли долийра. Цунна тӏехьара схьа Аьрзуна тӏебоьгӏна бара Эсетан ӏадийна бӏаьргаш. Ӏелина а гуш хийцайелира Аьрзун машаре йуьхь – хӏинца туркошна тӏеволавелларг машаран векал вацара, ткъа даимлера буьрса тӏемало Аьрзу вара:
Болатан шаьлтанаш
Баттара йахий вай,
Къизачу мостагӏийн
Догӏмаш тӏехь кегйе вай.
Делерчу орцанца
Кхалха го хадабай,
Мостагӏийн декъаш тӏехь
Ваьшна некъ биллий вай!..
Масех минот йалале, кхо бӏе гергга дошло, дойшна тӏе а ваьлла, бӏаьхаллин низаме хӏоьттина, Аьрзун омране ладоьгӏна сецира. Меллаша, амма низамехь, хьуьн чуй, боьрий дӏасабовла буьйлира зударий, бераш, къенаниш. Хезара бӏаьнчийн омранаш.
Ӏелас бӏаьрг туху шайн ницкъе. Кхо бӏе дошло. Шаьш а – гӏийла, говраш а – гӏийла. Бӏеннашка а нисвелла, тоьпаш карахь лаьтта пхи бӏеннал алссам гӏаш тӏемало. Тӏемалой аьлча а, и гӏаларташ. Ткъа царна тӏеоьху буьзна, берстина, хьербевлла туркойн салтий…
– Бӏаьнчаш! Тӏемалой Шоӏипах дӏасабаржабе! Чора! Дошлошца…
Аьрзун омра хадийра хӏаваъ къардеш йевллачу йаккхийчу тоьпийн а, туркойн гӏашлоша тоьхначу тоьпийн а татанаша.
Ӏелина гира вешин йуьхь чӏечкъашка йоьдуш, цо шен некха тӏе куьг хьуш, шен дошлошна хьалхаваьлла воьду Чора, цкъа аркъал а сеттина, тӏаккха, разваьлла, говрара чувужуш.
Тӏеман девза аз хезна, цкъа марсабаьлла Аьрзун дин, шен дена бохам хиллий хиъна, саца а сецна, терсира. Говрара чуиккхина тӏехьаьддачу ӏелас дӏалецира нуьйра тӏехь шалхавахана ваша. Мичара йели а ца хууш ӏелина улло хӏоьттира баттара йаьккхина шаьлта а карахь Эсет а.
Шиммо, меллаша говрара охьа а ваьккхина, лаьтта виллира Аьрзу.
Стигал къекъайора йуьйлучу йаккхийчу тоьпаша. Канашца ӏенош санна, гобаьккхина охьаоьгура цара схьайетта чаччамаш. Хӏаваэхь шакарш йетташ, цӏийзаш тӏехлелхара дӏаьндаргаш. Бӏаьхаллин маьхьарий деттара шина а агӏорчара:
– Аллахӏ!
– Аллахӏ!
Цхьанхьа-м йуьстахлаьттачу къеначу наха шайн ницкъ ма-кхоччу чӏогӏа нохчийн бӏаьхаллин илли бохура:
…Делерчу орцанца
Кхалха го хадабай,
Мостагӏийн декъаш тӏехь
Ваьшна некъ биллий вай…