Шега аьлла мел деса дош а цунна дагах кхетара, тӏаккха ша цхьа чӏогӏа декъаза стаг хийтира цунна. Эрна ладегӏна хиллера ас цуьнга, – элира цо соьга цкъа цхьа цӏенчу даггара. – Зезагаша дуьйцучуьнга цкъа а ладегӏа мегарг ца хиллера. Цаьрга хьоьжуш ӏен везаш хиллера, церан архьах* кийра бузош. Сан зезаго мерзачу архьах юьзнера сан ерриг сайрат, ткъа суна цуьнан пусар дан ца хиира. Цуьнан оцу цӏоькъех, церан ирчу мӏарех долу и къамелаш... Цара сан дог дашо дезаш дара, ткъа со мелхо а оьгӏазвахара... Кхин цхьана хӏуманна даре а дира цо:
– Со кхеташ хӏумма а ца хиллера хӏетахь! Цо дуьйцучуьнга а ца хьоьжуш, цо дечуьнга хьажа везаш хиллера. Цо суна шен хаза хьожанаш еллера, сан дерриг дахар серладаьккхинера... Со вада везаш ма ца хиллера. Цуьнан пекъарчу хӏилланашний, кийтарлошний тӏехьа суна ган езаш хилларг цуьнан ховха эсалалла ма яра. Дегбаамийн тӏаьхьало йоцуш хӏумнаш ю зезагаш! Амма дукха къона вара со хӏетахь, хӏумма а деза ӏемина вацара.
Со кхетарехь, иза цул тӏаьхьа, бовх-бовха мохк хоьржуш, кхерсташ лелачу олхазаршца цхьаьна некъаш гездан аравелира. Тӏаьххьарчу ӏуьйрана хьалхачул чӏогӏа битаме ялийна, новкъ-нацкъар дерг дӏасадаьккхина дӏахӏоттийра цо шен сайрат. Цо леррина дӏацӏандира аьрдаш долу тӏам-лаьмнаш. Аьрдаш болу тӏам-лам цуьнан шиъ бара. Гуьйрана тӏехь юург йохъян чӏогӏа аьтто болуш бара и шиъ. Царал сов ӏа яйна кхин цхьа тӏам-лам а бара цуьнан. Кхо хӏун до а, хӏун хаьа, элира цо шен дагахь. Тӏаккха и ӏаяйна тӏам-лам* а дӏацӏанбира. Тӏам-лаьмнаш ахь дикка дӏацӏандича, цкъа а ӏеттор доцуш, цхьанаэшшарехь гӏийлла догу. Тӏам-лам ӏеттор – иза пешан туьнкалг чохь кӏуьрзах йоьлла цӏе ягар санна ду. Вай-м, хӏокху лаьттара адмаш, дукха гӏийла хӏумнаш ю, вайга дӏацӏанлур долуш дац вайн тӏам-лаьмнаш. Цундела бовлу царах вайна оццул баккхий сингаттамаш. Юха Жимчу эло гӏийла ойлаярца бухъехира баобабан тӏаьххьара йисна зӏийдигаш. Ша кхуза юхавогӏур вац аьлла, тешна вара иза. Делахь а ӏуьйрана бечу балхах цо йоккха марзо оьцура. Тӏаьххьара зезагна хи а тоьхна, иза дӏахьулдан гӏерташ ша воллуш, цуьнан чӏогӏа велха догдеара.