Марша ӏойла хьо, – элира цо. Исбаьхьа зезаг дуьхьал дист а ца хилира. Марша ӏойла, – элира Жимчу эло юха а. Зезаго, «ахӏ-ахӏ» аьлла, йовхарш туьйхира. Шелделла хиларна а дацара и.
– Со ӏовдал хилла хиллера, – элира цо эххар. – Къинтӏераваьллахь суна. Хьайн десара, ирсе хила хьажалахь.
Цхьана а дашца дездер я бехкбаккхар а дацара цуьнан. Жимчу элана и тамашийна хийтира. Эхь хетта, лаьттара иза буйнахь аьнгалин пхьегӏа а йолуш. Цунна мичара ели хӏинца и тийна-таьӏна эсалалла?
– Хӏаъ, хӏаъ, суна хьо дукхвеза, – хезира цунна.
– И хьуна цахаар сан бехк бу. Хӏинца и коьрта ду. Хьо а хиллера, со санна, ӏовдал. Хьайн десара, ирсе хила хьажалахь... Дӏаяккха и пхьегӏа а, и суна кхин оьшуш яц.
– Ткъа мехаш...
– Иштта шелделла а дац со... Буьйсанан цӏена* хӏо суна мелхо а аьхна ду. Зезаг ма ду со.
– Ткъа акхарой, сагалматаш...
Ши-кхо нӏаьна лан мегар дац ас а, сайна полларчий довза лууш хилча! Уьш цхьа исбаьхьа долчух тера ду. Со долчу вогӏуш а цхьаъ хила ца веза? Хьо гена хир ма ву. Ткъа цу андийчу буьрсачу акхаройх со ца кхоьру. Сан а ю мӏараш. – Тӏаккха шен йилбазалдацарца шен диъ кӏохцал схьауьйхьира цо. Юха тӏетуьйхира:
– Дах ма дехьа, хала ду хӏара лан! Дӏаваха сацам хиллий хьан – дӏагӏой валахьа.
Жимчу элана ша доьлхуш гойла ца лаьара цунна. Чӏогӏа дегал зезаг дара иза... Вуно чӏогӏа дегал...
Тӏаьххьарчу суьйрана хьалхачул а чӏогӏа битаме ялийна, новкъар-нацкъарниг дӏасаяьккхина дӏахӏоттийра цо шен сайрат.
Жимчу элан сайратна уггар герга 325,326,32 329, 330 астероидаш яра. Дуьххьара царна тӏе кхача сацам хилира цуьнан: цхьа болх каро ма безара, стенна хилла а цхьана хӏуманна охӏла хила а. Хьалхарчу астероид тӏехь вехаш паччахь вара. Верриг таьӏна, цӏечу, юкъ-кара горнастай* экханан кӏайн чо болчу духарех хьаьрчина, иза дорахчу, хӏетте а шеца йолу сийлалла хаалучу курс-гӏента* хьалахиъна ӏара.
– Хӏа-а, хӏинца сан паччахьалла тӏехь долу стаг волуш ву-кх! – хазхетта мохь белира цуьнга, Жимчу элах бӏаьрг кхетташехь.
«Цунна хӏун хаьа, со мила ву? – ойла йира Жимчу эло. – Цунна-х со дуьххьара гуш ву».