***

Йочанаш, йоькханаш ца къасталучохь
Стаг бӏаьрзе ву.
Де буьйсанах ца къасталучохь
Стаг гӏайгӏане ву.
Безам цабезамах ца къасталучохь,
Стаг хьере ву.
Дика вонах ца къасталучохь,
Стаг велла ву.

* * *

Мархий^н гӏар бен тата доцчу йуьртахь
Дохкур ду ас не́ха^н гӏе́ний^н сурташ...
Бекъа урам буьллур бу ас цунна,
Кха́на школе ваха дезачунна.

Йекхна ӏуьйре йуьллур йу ас цунна
Кха́на го́та йоло дезачунна.
Маьлха-Аьзни йуьллур йу ас цунна
Ше́н безаман цӏарца вижначунна...

Кхи^н а, кхи^н а дохкур ду ас сурташ
Декъал хирриг хӏо́ра хӏокху йуьртахь
Амма хаац хӏу^н дуьллур ду цунна,
Шовзткъа шарахь кӏанте хьоьжучунна.

* * *

Йо́гӏу и, къежйелла месаш,
Зе́загийн курс буйнахь къуьйлуш,
Хӏинца а кӏента^н аз хезаш,
Хьомсара сурт сица къуьйлуш.

Хебаршка йаханчу йуьхь тӏехь
Гуш йу-кха не́на^н дог-ойла.
Кхоьлина, кӏант во́цуш йуххехь,
Сатуьйсуш кхи^н цкъа а гойла.

Йо́гӏу и сирлачу дийнахь
Везачу кӏантана хьалха,
Гора а йахана, тийна,
Бӏаьрхих ше́н дог ӏабош , йелха.

Дагахь ду ша́ аьлларг, къаьсташ,
Тӏаьххьара кӏант во́луш а́ра:
- Хилахь хьо къонахех къесташ,
Са^н на́кха бу хьу́на хьа́рам.

И дешнаш диц ца деш, кӏанта
Кхалхарца баьккхира толам.
Ткъа тахна и хьоьжуш лаьтта,
Хилла шех мокхаза хӏоллам.

Кӏант волчу йо́гӏуш йу на́на,
Дуьненан баркалла дахьаш,
Шерашкахь мел лайна ба́ла
Белхабан ше́н кийрахь бахьаш.

Тахане вай^н марша йоккхуш,
Ца дохош ша́ дина то́ба,
Кӏант воьжна на́на йу йо́гӏуш,
Гӏаттахьа сий деш, Европа!