***

Атта дац да́харехь адамех теша,
Нагахь и белахь хьа^н бакъболу тешам.

Атта дац да́харехь адамаш деза,
Нагахь и белахь хьа^н бакъболу безам.

Атта дац да́харехь стаг хилла ва́ха,
Нагахь и делахь хьа^н бакъдолу да́хар.

Атта дац да́харехь адамех къаста,
Нагахь и делахь хьа^н бакъдолу къастар.

Ва́ха а атта дац, ва́ла дац атта,
Атта дац велча а, чурт хилла, латта.

Ткъа адам — адам ду, ду цуьна^н декхар:
Бакъдерг ше́н белшаш тӏехь лакхене кхехьар.

* * *

Жӏаьлеш а дӏатоь кху шийлачу буса,
Дӏайуьжу са^н кӏо́тар, дӏа паргӏатйолу.
Дийнах мел дисинчух сай^н кийра буза
Бе́хачу новкъа со дӏа а́ра во́лу.

Са^н сих ма хьерчахьа, хӏай бетта^н ше́ло́.
Бӏешера^н кӏант ву со, Нохчийчохь кхиъна,
Лаьтта тӏехь мел йолчу на́нна го гӏело
Дезачу иллица цкъа йаййа^н лиъна.

Хӏу^н а́ла гӏерта хьо, хӏай дато экъа,
Тоьшалла хӏоттийна стигаллий, латтий,
Дуьненан кийрахь дӏа мел дина некъаш
Кху нохчий^н кӏо́тара кхехьначу кӏанте.

Со некъах вохаван хьо хӏунда гӏерта,
Са^н букъ тӏе йижина хӏай буто цхьалла.
Су́на йац хьу́на кху урамий^н керташ,
Йа су́на къевлина ков а дац цхьа а

Букв-тӏамарх чекхйуьйлуш хьо хӏунда цӏийза,
Кху некъан йо́халла ас хьоьшу гӏайгӏа.
Кху йуьртахь на́на йу соьга сатийса.
Кху йуьртахь доттагӏ ву са^н ба́ла байба.

Ас, лаахь, хӏоттор ду тховса а, хӏинцца,
Туьйранехь дуьйцуш а ца хезна ловзар.
Кӏентий бу, махко а йохьана бийццал,
Мехкарий, Европас Азица къовссал.

Лаьтта тӏехь мел во́лу некъахо вохва́н,
Кхерч бу са^н, ворхӏе а де́^н цӏарах ба́га.
Маьршачу куьйгашца дихкина кохкарш,
Са^н на́нас техкадо бӏешера^н а́га.

Цундела йац хьу́на, мел хьийза латта,
Со некъах вохаван гӏайгӏа йа ба́ла.
Цунде́ла бакъо йу са^н нохчий^н маттахь:
«Бийсолтан Диби^н кӏант ве́хаш ву», — а́ла