Дистхилийша шу мукъане а тховса,
Дистхилийша шу мукъане а цкъа.
Бакъо йац са^н хӏокху буса тхьовса,
Бакъо йац са^н мерза гӏе́наш га^н.

***

Дӏаоьху, дӏаоьху гунаш
Хаддаза дӏо́ анайисте.
Къинтӏера бе́р буй те́ су́на
Ас хьоьшу кӏо́таран синтем?

Дӏаоьху, дӏаоьху гунаш,
Со шайна тӏаьхьа дӏавоьхуш.
Къинтӏера бе́р буй те́ су́на
Ас дитча, уойлано лоьхург?

Цу шина хаттаро тховса
Со хӏунда гӏаттийна техьа,
Бӏаьргана ца гундерг довза,
Сица ла^н ницкъ бо́цург леха? .

Верриг а со хилларг ву со,
Делахь а цхьажимма вайна.
Кху лаьттах йекхачу буса
Цунде́ла йазлой те́ гӏайгӏа?

Верриг а со хилларг ву со,
Делахь а цхьажимма кхетта.
Кху баттал лекхачу буса
Цунде́ла гӏуьттий-те хеттарш?

Цу шина лаамо тховса
Со хӏунда гӏаттийна техьа,
Цкъа а ца девза дегӏ довза,
Цкъа а ца лехна дерг леха?

***

Шаьлтана^н цхьа Даймохк бу — къонахчун буй.
Кӏиллочун буйнахь и махках ваьлла стаг санна йамарта хуьлу.

* * *

Кхи^н де до́цуш висахь илли кхолла,
Дехко санна буур бу ас кхоллам.

Грамматикех лаьцна

Дерриг а са^н дӏадаьлларг йахана хан йу.
Ас да́харе салам луш кховдийначу куьйга^н пхи пӏелг санна, пхи кеп йу цуьна^н:

ӏ. Хӏинца йахана са^н хан — тӏаьххьара илли.

2. Гуш йаханарг — са^н тӏаьххьара безам .

3. Йаханарг — бе́ралла.

4. Хьалха йаханарг — са^н дуьххьара безам.

5. Ихнарг — са^н не́на^н бӏаьрхиш.

Долушдолучуьнга ас салам кховдийна а дац — билгалза кеп йу. Ткъа сай^н хиндерг су́на дуьхьалхӏоттина дац — иза йо́гӏу хан йу. Ас, ойлайеш, дӏахьаббо бӏаьрг санна, ши кеп йу цуьна^н:

ӏ. Йо́гӏуйерг — сох поэт хир ву.

2. Йа́^н мегарг — со ирсе́ хир.

Мичхьа йу хьо, карара хан?

***

Шийла ойла...
Иэхӏ, ма гойла-кх
Кхи^н иштаниг адамна.
Марша ӏойла —
Марша гӏойла,
Дог а тийжаш хаддаза.
Дай^н куьг хьаькхна,
Хиш дӏадаьхна,
Бӏаьргаш цӏанбеш харцонах,
Хаза, аьхна
Хьоьга хьаьжна,
Хьаста стаг а ва́цара.
Шийла ойла
Кхи^н хьо гойла
Хир до́цийла кхе́тара,
Са^н са ойуш, —
Марша ӏойла, —
Хезар до́ций ке́тӏара.
Со мел гӏертарх
Сайха кхе́та,
Некъо хьо дӏайайира.
Да́ во́цучу
Жӏаьлех леташ,
Шийла суьйре йеара.