بسم الله الرحمن الرحيم

Хастам бу Алла́хӏна - ӏа́ламий^н Де́ла волчу; беркате, хьикмате, сийлахь, ла́раме долу Къуръа́н доссийначу; адамаш и́манехь нисдинчу, Исла́ма^н новкъа даьхначу, царна ихьса́не некъ гайтинчу!

Алла́хӏера къинхетам а, маршо а хуьлда адамий^н э́ла волчу, элчаний^н имам волчу, бакъонан гӏортор йолчу Мухьаммадна а, сийлахьчу цуьна^н гергарчарна а, тӏехдикачу цуьна^н асхьа́башна а, массо меттехь а, йерриге за́манашкахь а!

Ла́раме йешархо! Цхьаболчу ӏе́ламна́ха, шовзткъа хьадис гулдеш, кегийра пайдехь жайнаш йаздина. Царех ду – дина^н баххашха лаьцна йаздинарш, жихӏа́дах лаьцна йаздинарш, гӏиллакхех лаьцна йаздинарш, хьехамех лаьцна йаздинарш, Де́ла цхьаъ вара^н шахӏа́дата^н дозаллех лаьцна йаздинарш и.кх.дӏ. Дерриге а и жайнаш йаздар дика ӏа́лашонаш йуьхьарлаьцна нисделла ду (Алла́хӏ ре́за хуьлда уьш йаздиначарна массарна а!).

Исла́м-дина^н тайп-тайпанарчу дакъошха лаьцна шовзткъа хьадис чохь гулдина жайнаш йаздар хьалхахьалха за́манашкахь дуьйна схьадо́гӏуш ӏе́ламне́ха^н ӏа́дат ду. Це́ра^н лорах ва́харан нигатца а, Алла́хӏерчу йо́ле, Цуьна^н къинхетаме сатесна а, хӏокху бух цӏенчу хьадисехь «…Шух кхузахь волучо хаам бойла кхузахь воцучуьнга» бо́хург кхо́чушдара^н ӏа́лашонца а, хӏокху жайнахь вай а гулдина Сийлахьчу Къуръа́на^н дозаллех лаьцна нуьрах лепа шовзткъа хьадис.

Хӏокху жайнарчу хьадисаша гойтур ду Сийлахь Къуръа́н дешар а, хьехар а, ӏамор а беркате ӏамал хилар. Дуьненахь а, э́хартахь а пайда хе́дан боцу ӏамал хилар а. Доьшучуьнга синтем боссош а, мали́каша и доьшуче́ра^н гуламаш лоьхуш йолу ӏамал хилар а. И доьшучуьра шайтӏанаш довдуш хилар а. И доьшург бозбуунчий^н вонех ларвеш хилар а. И хууш берш ла́мазехь хьалхаба́ха уггаре а хьакъ берш хилар а. Цул а сов цуьнгахь адамий^н дегнашна дарба, синошна синтем хилар а. Кхи^н а мел йу беркатечу Къуръа́нан дикаллаш, мел йийцарх а кхачор йоцуш?!