Ребаӏат. Бакъ дийцар

Зойрбека^н шаьлтана литтане бӏаьрг тохарх гуш дара, и бинчу балхана ре́за хилар. Шаьлтане шок тухийтуш, цуьна^н да́с и говза хьовзаро а, цунна тӏе кхоьссиначу йовлакхах кесаг дӏакхоьссина хиларо а гойтура – Ребаӏат ше́н белхана лаккхара мах ха́дор дехан бакъо йолуш хилар.

Зойрбека^н серладаьллачу бӏаьрсинах самукъадаьллачу Ребаӏатас тидам ца бира, майрачо ше́н цӏена гӏовтал, балха воь́душ ша лелош йолучуьнца хийцар. Суьйренга гӏуртуш йара хан Зойрбек сиха ше́н шаьлта йукъах а йихкина ара волуш, ша́ хьен ца ло о́луш, чохь са ца гаттадайта.

Хан йаьлла хан йара Ребиӏат стенна а делахь а, са ше́н меттехь до́цуш, майрачуьнга хьоьжуш ӏаш. Цӏаьххьана уьйчохь гӏовгӏа хезина хӏара мехкадаьтта дутту чиркх буйна а эцна а́ра йаьлча. Зойрбек вара аьро а́гӏора цӏийх буьзина ше́н пхьарс аьтто куьйга лаьцна чу во́гӏуш.

- Ва-а! Хӏу^н хилла! – йоьхна хьаьвзира Ребаӏат.

- Хӏума ца хилла! Ма хье́кха мохь, - зуда дӏа а тоттуш йиллинцу неӏарах чоьхьа ве́лира Зойрбек.

Паднаран йисте охьа а хиъна ше́н човне хьаьжира и. Ребаӏатас чиркх улло́ бехьича чов дика къаьсташ йара – белш горгалучуьра динна жижгана аса йара охьаоллайелла гӏовтал а ха́дош.

Зударшна оцу хе́нахь хууш дара муьлхха а чевна дарба ден а́гӏонаш. Кхи^н дукха дарбанаш а да́цара уьш. Сиха кечбира Ребаӏатас туьхан бе́рам. Гӏовтал йаьтӏначу меттехь кхи^н хьем ца беш, массо а а́гӏора оцу бе́рамца чов цӏена цӏан а йина, охьакхозу жижиг ше́н метте́ тӏело́цуш чӏо́гӏа дӏадихкира зудчо. Жимма аз лахдар бен кхи^н бе́рамо ша́ вагор ца хаадалийтира Зойрбека. Кхи^н гӏовтал бен тӏера хӏума дӏа ца йоккхуш паднара тӏехь дӏавижира а.

Шолгӏачу дийнахь Тетин некъех болу кегийра а баккхийра нах гулламе вовшаха кхетча къаьстира хилларг. Лахахьа ӏаш болчу чӏинхойх на́ха шай^н хьалхо вийначу стагана дуьхьала чӏира е́ца бахана хилле́ра Тети^н некъаха кегийра нах. Царна йукъехь хилле́ра Зойрбек а. Тети^н некъашкахь ма́рехь йолчу цхьана зудчо хӏокхе́ра^н чӏирхошка мотт бехьана, гӏодмашна йуккъехула тӏелата бахначу кегирхошна, кӏела хевшина хилле́ра хӏокхе́ра^н мостагӏий. Тети^н некъахойх цхьаъ вуьйш, чӏирхойшаха цхьаъ вуьйш дӏа́сакъаьстине́ра довхой.

Зойрбекана оцу девна йуккъехь хилле́ра чов.